खोज

बुटवल (बुटवलटुडे), २६ असोज । मासु उत्पादन गर्ने व्यवसायी किसान, मासुको कारोबार गर्ने व्यवसायीहरूको सहभागीता विना बुटवल उपमहानगरपालिकाले पशु बधशाला सञ्चालन बारेमा छलफल गरेको छ । बुटवल उपमहानगरपालिकामा आयोजना गरिएको छलफल कार्यक्रममा नगर प्रमुख खेलराज पाण्डेयले सञ्चालनको लागि अवरोध गर्न नहुने बताएका थिए ।

बुटवलको आधुनिक पशु बधशाला सञ्चालनबारे सरोकारवालाबीच छलफल भएको छ । बुटवल १० रामनगरमा दुई बिघा ३ कठ्ठा क्षेत्रफलमा बनेको बधशाला सञ्चालनका लागि मुक्तिनाथ लाइभस्टक बैंक लिमिटेडले ठेक्का सम्झौता गरेपछि सञ्चालन गर्नेबारे सरोकारवालासँग छलफल गरिएको हो । यो भन्दा पहिला २५ हजार किसान महिला, १४ सय भन्दा बढि मासु व्यवसायीहरूको सहभागीतामा निर्माण गरिएको बुटवल मासु उत्पादन तथा प्रसोधन कम्पनी प्रालि लाई बधशाला सञ्चालन गर्ने प्रारम्भीक सम्झौता भए पनि करिव २ बर्ष सम्म उक्त कम्पनी प्रालिको १ करोड रकम धितो को रूपमा राखेर नगरपालिकाले अर्को नीजि कम्पनी मुक्तीनाथ एग्रो कम्पनीलाई बशाला सञ्चालनको लागि ठेक्का दिएको छ ।
प्रदेश सरकारले मासु उत्पादन देखि बजारीकरणमा उद्यमशिल महिलाहरूको सहभागीता हुने भन्दै लगानी गरेको थियो भने हेफर ईन्टरनेशनलले महिलाहरूको उद्यमशिलताको लागि भन्दै बधसालामा डिपीआर देखि प्राविधीक निर्माणको सहयोग गरेको थियो । यद्यपी अन्तीम समयमा आएर नगरपालिकाले ठेक्का नीजि कम्पनीलाई दिएपछि बुटवलका व्यवसायीहरू,महिला किसान तथा अन्य व्यवसायीहरूले यसमा अवरोध गर्ने बताउँदै आएका छन् ।

कार्यक्रममा बुटवल उपमहानगरपालिकाका प्रमुख खेलराज पाण्डेयले बुटवलको बधशाला कानुनी प्रक्रियाअनुसार सञ्चालनको चरणमा रहेकाले सञ्चालनका लागि सबैको साथ र सहयोग आवश्यक रहने बताए । उनले बधशाला सञ्चालनका लागि कसैले अवरोध गर्ने र बुटवलबासीको स्वच्छ र स्वस्थ मासु उपभोग गर्न पाउने अधिकारमाथि हस्तक्षेप गर्न नहुने बताए ।

जिल्ला समन्वय समिति रूपन्देहीका प्रमुख उमाकान्त चपाइँले बधशाला सञ्चालनका लागि मासु व्यवसायीले सहकार्य गरी उपभोक्ताको पक्षमा निर्णय लिन आग्रह गरे । बुटवल उपमहानगरपालिकाका उपप्रमुख सावित्रादेवी अर्यालले बुटवलका मासु पसलहरूले स्वच्छ मासु बिक्री गर्नका लागि बधशाला सञ्चालनमा ल्याइएकाले कसैले पनि यसमा असहयोग र अवरोध गर्न नहुने बताईन ।
बुटवल उपमहानगरपालिकाका प्रमुख प्रशासकीय अधिकृत विष्णु प्रसाद भुसालले बधशाला सञ्चालनले बुटवलको गरिमा बढ्ने र यसले उपभोक्ताका साथै व्यवसायीलाई समेत लाभ हुने बताए ।

कार्यक्रममा मुक्तिनाथ लाइभस्टक लिमिटेडका प्रतिनिधि सन्तोष अधिकारीले बधशाला सञ्चालनमा मासु व्यवसायी र किसानहरूलाई सँगसँगै लिएर अगाडि बढ्ने बातए । मासु व्यवसायी विशाल थापाले बधशाला सञ्चालनमा मासु व्यवसायी र किसानलाइ बाहिर राख्न नहुने बताए ।
कार्यक्रममा पशु क्वारेन्टाइन भैरहवाका डा भक्त निउरे, उपभोक्ता हित संरक्षण मञ्चका समुन्द्र जिसी, होटल तथा रेष्टुरेन्ट व्यवसायी संघका अध्यक्ष लेखनाथ भण्डारीलगायतले बोल्दै बुटवलको पशु बधशाला सञ्चालनले यस क्षेत्रकै मासु व्यवसायमा स्तरवृद्धि हुने र यसले देशभरमै राम्रो सन्देश जाने बातए । बुटवलको आधुनिक पशु बधशाला सञ्चालनका लागि बुटवल उपमहानगरपालिका र मुक्तिनाथ लाइभस्टक बैंक लिमिटेडबीच भदौ ३१ गते सम्झौता भएको थियो ।

सम्झौताअनुसार मुक्तिनाथ लाइभस्टकले असोजभित्रमै बधशाला सञ्चालनमा ल्याउनेछ । बुटवल १० रामनगरमा दुई बिघा ३ कठ्ठा क्षेत्रफलमा बनेको बधशाला सञ्चालनका लागि यसअघि सहमति भएपनि विधि र प्रक्रिया नपुगेपछि उपमहानगरपालिकाले गत असारमा पुनः टेण्डर आह्वान गरेको थियो। मुक्तिनाथ लाइभस्टकले वार्षिक ५८ लाख ३८ हजार ७ सय १० रूपैयाँ बुटवल उपमहानगरपालिकालाई बुझाउने छ। पशु बधशाला सञ्चालन गर्दा पशु बधशाला र मासु ऐन २०५५, पशु स्वास्थ्य तथा सेवा ऐन २०५५, फोहोरमैला व्यवस्थापन ऐन २०६८, वातावरण संरक्षण ऐन २०७६ र उपभोक्ता संरक्षण ऐन २०७५ को पालना गर्ने गरी सम्झौता भएको छ ।

सम्झौता कार्यान्वयनमा आएपछि बुटवल नगरभित्र पशु बधशालाबाहेकका स्थलमा व्यवसायिक रूपमा खसी र बोकाको बध गर्न रोक लगाउने र बध गरेको पाइएमा कारबाही गर्ने सम्झौतामा उल्लेख छ । बुटवल उपमहानगरपालिकाको पशु बधशाला व्यवस्थापन र सञ्चालन ऐन २०७९ अनुसारको यो व्यवस्था कार्यान्वयनमा आएपछि बुटवलमा रहेका मासु पसलहरूले खसीबोकाको मासु बिक्री गर्दा पशु बधशालामा बध गरी प्रमाणिकरण गरेको मासु मात्रै बिक्री गर्न पाउने छन् ।

बधशाला सञ्चालनका लागि बुटवल उपमहानगरपालिकाले नगर सभाबाट पशु बधशाला सञ्चालन र व्यवस्थापन ऐन २०७९ पारित भइसकेको छ। ऐनअनुसार पशु बधशाला सञ्चालन तथा व्यवस्थापन गर्ने, मापदण्ड पूरा गरी बध गर्ने, बिक्री केन्द्रसम्म ओसारपसार गर्दा मापदण्ड पूरा भएका साधनको मात्रै प्रयोग गर्ने, बिक्री गर्न इजाजत पत्र लिनुपर्ने जस्ता व्यवस्था गरिएको छ ।
झन्डै २२ करोड लगानीमा निर्माण भएको बधशाला क्षेत्रमा खसीबोकाको चरन, होल्डिङ सेन्टर, पशु स्वास्थ्य जाँच तथा उपचार कक्ष, बधशालामा खटिनेहरूका लागि प्राथमिक उपचार कक्ष, सुरक्षा कक्ष, फोहोर प्रशोधन केन्द्र, हरियाली उद्यान र बगैँचा निर्माण भएको छ ।