दाङ, २१ भदौ ।
तुलसीपुर उपमहानगरपालिकाले किसान सूचीकरण सुरु गर्न थालेको छ । पालिकाले प्रारम्भिक चरणमा एक हजार घरधुरीबाट किसान सूचीकरण सुरु गर्न थालेको हो । कृषि शाखाका प्रमुख धनराज गौतमले किसान सूचीकरणबाट मात्रै किसान र गैह्र किसानका बारेमा जानकारी हुने बताए । उपमहानगरपालिकाभित्र ४६ हजार घरधुरी रहेको छ । संघीय सरकारले किसान सूचीकरणको काम सुरु गरेको अनुसार उपमहानगरपालिकाले शुरु गरेको हो । वास्तविक किसानहरुको यकिन तथ्याङ्क नहुँदा सरकारले दिदै आएको अनुदानमा समस्या देखिदै आएको कृषि शाखाका प्रमुख गौतमले बताए ।
उनले वास्तविक किसानको तथ्याङ्क आएपछि राज्यले दिने अनुदानको सही सदुपयोग हुने र गैह्र किसानले लाभ लिन नसक्ने बताए । शाखा प्रमुख गौतमका अनुसार सूचीकरणमा किसानले उत्पादन अन्नबाली, फलफूल तरकारी, दुग्धजन्य वस्तु र मासुको विवरण समावेश गरिने भएको छ । सूचीकरण पछि किसानहरुलाई क्यूआर कोडसहित परिचय पत्र समेत दिइने भएको छ । पालिकाभित्र ४६ हजार घरधुरीको सूचीकरण गर्नका लागि ३५ लाख खर्च लाग्ने भएको छ ।
तुलसीपुर उपमहानगरपालिकाले किसानले उत्पादन गरेका कृषिजन्य वस्तुको बजार क्षेत्रमा बिक्री वितरणका लागि किसान परिचय पत्र वितरण गरेको छ । किसानले उत्पादन गरेका वस्तु बजार क्षेत्रमा बिहान ५ देखि ८ बजेसम्म परिचय पत्र राखेर बिक्री गर्ने गरेको कृषि शाखाका प्रमुख धनराज गौतमले जानकारी दिए ।
नगरप्रमुख टीकाराम खड्काले किसान सूचीकरण सुरुवात् गरिएको र पालिकाका १९ वटै वडामा गरिने बताए । उनले सूचीकरण तथ्याङ्क आएपछि अनुदानको मल, बिउ र किसानलाई प्रदान गरिने सेवासुविधाका विषयमा योजना निर्माण गर्न सकिने बताए । नगरप्रमुख खड्काले संघ, प्रदेश सरकारसँग समन्वय गरेर दुई वर्षभित्रै सूचीकरणको काम सकिने बताए ।
दाङ जिल्ला सहकारी संघका सचिव शुक्रराज भण्डारीले किसान सूचीकरणका लागि विगतदेखि माग राख्दै आएकोमा तीन वटै तहका सरकारबाट काम सुरु हुनु किसानका लागि सकारात्मक कार्य भएको बताए ।
तुलसीपुर उपमहानगरपालिका वडा नम्बर १९का किसान पलबहादुर वलीले किसान सूचीकरण भएसँगै वास्तविक किसानले राज्यबाट प्रदान गर्ने सेवा सुविधा प्राप्त गर्न सहज हुने बताए । जिल्लामा शान्तिनगर, राप्ती गाउँपालिकाले किसान सूचीकरणको काम सुरु गरिसकेका छन् ।
५ आश्विन २०८१, शनिबार
