खोज

नवलपुर, १९ भदौ ।

पुर्वी नवलपरासीको कावासोती नगरपालिका वडा नं. १७ गोछाडामा ड्रागन फ्रुटको खेती शुरु गरिएसंगै यस यस खेतीतर्फ किसानको आकर्षण बढेको छ । नेपालभरी नै फैलिएको ड्रागन फ्रुट खेती अहिले नवलपरासी पुर्वमा समेत फस्टाउन थालेपछि किसानहरु उत्साहित भएका छन् ।

नवलपरासी पुर्वमा कावासोती नगरपालिका १७ गोछडाबाट शुरु भएको यो खेती अहिले गैंडाकोट नगरपालिका, देवचुुली, मध्यबिन्दुु नगरपालिकामा समेत बिस्तार भएको छ र दुईसय कृषकले आठसय बिगाहामा अहिले यो खेती गरिरहेका छन् भने आगामी वर्ष चारहजार बिगाहामा लगाउने योजना रहेको कावासोतीका नवराज सुवेदीले बताए ।

सुवेदीले ड्रागन फ्रुटको खेती शुुरुमा पाँच विगाहा जग्गामा लगाएको र सबै जग्गाहरु लिजमा लिएर यो खेती गरेको बताए । उनले फार्म स्थापना भएको तीन वर्षपछि मात्र ड्रागनफ्रुटको खेती सुरु गरेको र ड्रागनको खेती गर्नेका लागि पाँच विगाहा जग्गामा पाँच लाख लगानी भएको सुनाए ।

ड्रागन फ्रूटको वैज्ञानिक नाम हिलोकेरेस अंडेटस हो । यो दक्षिण तथा मध्य अमेरिकाको रैथाने फल मानिन्छ । यो गुदीले भरिएको र रसिलो हुन्छ । यसका फुलहरु अत्यन्तै सुगन्धित हुन्छन्, जुन रातमा फुल्छन् र बिहानसम्म झरिहाल्छन् । ड्रागन फ्रुटको हेरचाह गर्नेका लागि सात जना कर्मचारी राखेको र नियमित काम गर्ने तीनजना रहेको सुवेदीले बताए ।

मानव जीवनमा फलफुलको धेरै नै महत्व हुन्छ । तसर्थ बजारमा आएका नयाँ–नयाँ फलफूलहरु नेपालमा पनि खेती गरेर आम्दानी गर्न सकिन्छ । अहिले नेपाली बजारमा ड्रागन फल प्रतिकिलो रु पाँच सयदेखि आठ सय सम्म खरिद बिक्री भइरहेको छ । यसको फलका रंगमा रातो फलमा सेतो गुदी हुन्छ । कुनै रातो फलमा रातो नै गुदी हुन्छ र पहेंलो फलमा सेतो गुदी हुन्छ । पहिलो वर्षको अन्तिमबाट फल लाग्न सुरू भएपनि व्यावसायिक हिसाबले भने दोस्रो वर्षबाट मात्रै यसबाट आम्दानी लिन सकिने कृषकहरुले बताए ।

अहिलेका युवाहरुको लागि यो राम्रो रोजगारको अवसर हो, जो रोजगारकै क्रममा विदेशिन्छन्, उनीहरुले विदेश जाने लगानी यहीं कृषिमा गरे धेरै राम्रो फाईदा हुने कृषक सुवेदी बताउँछन् । कहिलेकाहीँ बजारमा भाउ नपाउँदा लागेको लगानी पनि नउठाउने तर हामीले सिजनमा बेच्न सक्यौं भने राम्रो आम्दानी हुने उनको भनाई छ ।

विगत दुई वर्षदेखि काम गर्दै आएको र अहिले नयाँ फल ड्रागन फ्रुटको लागि काम गरी राख्दा नयाँ अनुभुती भएको कृषक लक्ष्मी कुमाल बताउँछिन् । यो फललाई दिनभरी समय दिएर हेरि राख्न नपर्ने र विहान बेलुका मात्र काम गर्नुपर्ने र काम सजिलो भएको कुमालको भनाई छ । कृषि ज्ञान केन्द्रका प्रमुख गोपाल लामिछानेले यो खेती गर्ने कृषकहरुलाई कार्यालयले आवश्यक ज्ञान, तालिम दिएको बताए ।