खोज

लुम्बिनी प्रदेशका नवनियुक्त मुख्यमन्त्री कुलप्रसाद केसीले प्रदेश सरकारको काम कार्वाहीलाई प्रभावकारी रुपमा अगाडी बढाउने बताएका छन् ।

उनले गठबन्धन दलहरुसँगको छलफल र समझदारीमा सरकारका काम अगाडी बढाउने बताए ।

शिक्षकका रूपमा गिरिजाप्रसाद कोईराललाई कोलोझण्डा देखाउँदा जागिर गुमाएर युद्धमा होमिएका केसी लडाकू कमाण्डर हुँदै मुख्यमन्त्रीसम्म भएका हुन् । यस्ता छन् उनका प्राथमिकताहरु

१) प्रदेश संरचना बलियो बनाउँछौंः
हाम्रो प्राथमिकता विधि प्रक्रियालाई सुव्यवस्थित गर्ने हुन्छ । विधि र प्रक्रियालाई व्यवस्थित गर्ने र स्थापित गर्ने हामी काम गर्छौं । प्रदेशको संरचनालाई बलियो र व्यवस्थित गर्ने काम गर्छौं । संविधानको कार्यान्वयनलाई सुव्यवस्थित गर्नुपर्छ भन्ने नै छ । त्यसमा गठबन्धन प्रतिबद्ध छ ।

२) साझा नीति तथा कार्यक्रम बन्छः
नेपालको संविधानअनुसार हाम्रो साझा नीति तथा कार्यक्रम बन्छ । प्रदेशका जनताले के अपेक्षा गरेका छन् ? देखिनेगरी परिणाममुखी कार्यक्रमहरू कार्यान्वयनको चरणमा अघि बढाउँछौं । गठबन्धनको चाहनाअनुसार सरकार अघि बढ्छ ।

३) साझा रोडम्यापमा अघि बढछौंः
हामीले स्पष्ट रोडम्याप नै बनाएर अघि बढ्ने भनेका छौं । त्यसैले खासै समस्या आउला जस्तो लाग्दैन । हाम्रो आपसी समझदारी जे छ त्यसलाई सुव्यवस्थित गर्ने र संस्कार स्थापित गर्ने कुरा हो । त्यो संस्कारबाट जनतालाई डेलिभरी दिन योग्य प्रतिस्पर्धा पनि आवश्यक हो । हामी गठबन्धन बनाउदादेखि नै क्लियर भएर सहयात्रा गरेका छौँ । संस्कार देखाउने विषयमा हामी अब्बल नै छ ।

४) बजेट र नीति कार्यक्रम संशोधन हुन्छः
सरकार परिवर्तनपछि बजेट र नीति कार्यक्रम संशोधन स्वभाविक हुन्छ । त्यसलाई अन्यथा लिनुपर्दैन । अघिल्लो सरकारले संविधानको सर्वोच्चतालाई अपहेलना गरेर अध्यादेशबाट बजेट जारी ग¥यो, त्यो त गलत थियो । नयाँ गठबन्धन सरकारले त्यसलाई प्रतिस्थापन गर्छ । हामीले प्रदेशको सबै पक्षलाई समेटेर साझा दस्तावेज बनाउने छौं । त्यसमै धेरै कुरा पर्ने छन् ।

५) डेडलाइन बनाएर राजधानीको संरचना बनाउँछौंः
स्थायी राजधानीको संरचना निमार्णको काम अघि बढेको छ त्यसलाई डेडलाईन बनाएर टुंग्याउँछौं । जहाँ जहाँ समस्या छ अहिले अस्थायी रूपमै भए पनि समस्याको व्यवस्थापन गरेर परिणाम दिनुपर्छ भन्ने लाग्छ । सुरु भएका कामहरू अवश्यकताअनुसार परिमार्जन गरेर हामी अघि बढ्छौं ।