खोज

खजुरा अर्थात पुरानो एयरपोर्ट !

हालको राँझा एयरपोर्ट संचालन हुनुपूर्व खजुरामा बिमान आवात–जावत गर्थे ।

सदरमुकाम नेपालगञ्ज आउन त्यही बाटो प्रयोग गर्नुपथ्र्यो ।

धेरै नयाँ पुस्ताका लागि यो कुरा बिश्वास नलाग्न सक्छ । तर बास्तविकता यही हो ।

राजा, प्रधानमन्त्री जस्ता भिभिआईपीदेखि सर्वसाधारणहरु नेपालगञ्ज पुग्न खजुरा एयरपोर्टमा ओर्लिन्थे । खजुराको बाटो हुँदै जिल्ला सदरमुकामको गन्तव्यमा पुग्नुपथ्र्यो । बुढापाकाका लागि ताजा रहेको यस्ता सम्झना नयाँ पुस्ताका लागि भने सपना जस्तो लाग्छ ।

एयरपोर्ट लगायत महत्वपुर्ण सरकारी निकायहरु रहेकाले खजुरा जिल्लाकै शक्तिशाली ठाउँ थियो । स्थानीय अगुवा शतिश निरौलाका अनुसार, पुनर्बासका रूपमा तत्कालीन शासक महेन्द्रले बसाएको ठाउँ हो त्यसैले यहाँ विभिन्न ठाउँबाट बसाई सराइ गरेर आएका मानिसहरुको मिश्रीत बसाई छ ।

जसरी जङ्गबहादुरले निकै चासोका साथ नेपालगन्ज शहर बसाए उस्तै चासो अनि राष्ट्रिय महत्वकाका साथ तत्कालीन राजा महेन्द्रले बसाएका थिए यो बस्ती । भारतीय सिमाना छेउ छेउ मा पूर्व सैनिकहरुलाई बसोबास गराएर अलि वरका ठाउँमा अन्य बस्ती बसाए त्यसो गर्नुमा सिमा जोगाउने चासो हुनुपर्छ उनको ।

‘खजुराको रुप बिस्तारै फेरिदै त छ नै पछिल्लो स्थानीय निर्वाचन पश्चात् । हामी यसलाई अझ स्मार्ट बनाएर लैजादै छौं ।’– गाउँपालिका अध्यक्ष किस्मत कक्षपति भन्छन् । त्यसरी कुनै बेला जिल्लाकै लिड गर्ने अवस्थामा पुगेको खजुरालाई फेरी त्यसैगरी चम्काउने बहस र छलफल हुन थालेका छन् । गाउँपालिका प्रमुख किस्मत कुमार कक्षपति बृहद खजुरा सम्मेलन त्यसैको रुप भएको बताउँछन् । कक्षपति भन्छन,–‘नयाँ ढङ्गले खजुरालाई अगाडी बढाउने योजना बन्दै छ ।

खजुरामा कृषि क्षेत्रमा अध्ययन अनुसन्धान हुने कार्यालयदेखि कपास विकास समिति, जनक शिक्षा सामाग्रीको छापाखानादेखि पछिल्लो समय क्यान्स अस्पतालसम्म सन्चालनमा ल्याइएको छ । तर सबै कार्यालय पुर्णरुपमा सन्चालन हुन सकेका छैनन् । राजनीतिक नेतृत्वले ती कार्यालय चासो नदिइरहेका बेला मुख्यमन्त्रीलाई समस्याका बारेमा ध्यानार्कषण गराइएको हो ।

खजुरा सम्मेलनको उद्घाटन गर्दै मुख्यमन्त्री पोख्रेलले आमनागरिकले बिश्वास गर्न सके मात्र कुनै पनि ठाउँको विकास गर्न सकिने बताएका थिए । उनले भने,–‘राज्यका निकायप्रति भरोसा गर्ने समाजले मात्र परिवर्तन गर्छ ।

अन्यथा परिवर्तन गर्न सक्दैन ।’ सामाजिक सन्जालमा कसैले केही लेखिदिएकै भरमा त्यसको सत्यता नखोजी सरकारको उछितो काड्ने काम भएको मुख्यमन्त्री पोख्रेलले बताए । उनले खजुरावासीको विकासको काममा साथ दिने उल्लेख गरे । ‘म यहाँ धेरै पटक आए । यहाँका बाटोघाटोका बारेमा जानकार छु । योजनाबद्ध तरिकाले बसेको बस्तीमा धेरै कुरा अधुरो भएको देख्दा चित्तबुझेन ।’मुख्यमन्त्री पोख्रेलले भने–‘तपाईका बारी बाझो छ त्यसमा राजनीतिक नेतृत्वले केही गर्न सक्दैन । यत्ति काम तपाईहरुले गर्न सक्नुहुन्छ ।’

खजुराले फेरी पुरानै बिरासत फर्काउदै छ । केन्द्रीय सरकारको औद्योगिक ग्राम योजना त्यही कार्यान्वयन भइरहेको छ । त्यसले स्थानीय उद्योगलाई आकृषित गर्ने गाउँपालिका उपाध्यक्ष एकमाया बिक बताउँछिन् । औद्योगिक ग्राम निर्माणको कार्य जारी छ । त्यसै चिनको एउटा संस्थासंगको सहकार्यमा ठूलो लगानीमा हरित खजुरा प्रोजेक्ट सन्चालनको तयारी भइरहेको छ । उक्त प्रोजेक्टका लागि सम्झौता भइसकेको भएपनि लकडाउनका कारण सन्चालन हुन सकिरहेको छैन ।

खेलकुद ग्रामदेखि अन्य पूर्वाधार विकासका योजनाहरु सन्चालन भइरहेको गाउँपालिका अध्यक्ष किस्तमत कक्षपति बताउँछन् । उनी भन्छन्–‘कोरोना कहरले हाम्रो विकासमा ब्रेक लगाएकै हो तर अब हामी धमाधम काम शुरु गर्छौ । खजुरा पुरानै लयमा फर्किन्छ ।’