खोज

बुटवल, ११ असार । तिलोत्तमा नगरपालिकाका किसानलाई ज्योति विकास बैंकले धान रोप्ने मेशिन दिएको छ । संस्थागत सामाजिक उत्तरदायित्व अन्तर्गत बैंकले तिलोत्तमा–१० को उद्यमशील टोल विकास संस्थाका किसानलाई धान रोप्ने मेशिन दिएको हो ।
लुम्बिनी प्रदेशका कृषि तथा भूमि व्यवस्था मन्त्री भण्डारीलाल अहिर र बैंकको बुटवल क्लस्टर प्रमुख कपिल न्यौपानेले टोल विकास संस्थाका अध्यक्ष घनसिंह पुनलाई करिब ६ लाख मूल्यको उक्त मेशिन हस्तान्तरण गरेका हुन् ।
सो अवसरमा मन्त्री अहिरले कृषिलाई प्रविधिसंग जोडेर व्यवसायिकरण गर्नुपर्नेमा जोड दिए ।
प्रदेश योजना आयोगका पुर्व सदस्य डा. दामोदर भुसालले देशको कूल जनसंख्याको दुई तिहाई कृषिमा संलग्न रहे पनि सरकारले बजेटमा कृषिलाई प्राथमिकतामा राख्न नसकेको औंल्याउंदै कृषिमा लगानी बढाउनुपर्ने माग गरे ।
उनले मानव स्वास्थ्य र माटोकोे सुरक्षाका लागि प्रांगारिक कृषिलाई प्राथमिकतामा राखेर यसको व्यवसायिकरणमा सरकारको ध्यान जानुपर्ने औंल्याए । डा भुसालले अन्य बैंक तथा त्तिीय संस्थाहरुले पनि अनुत्पादक क्षेत्रमा संस्थागत सामाजिक उत्तरदायित्वको वजेट खर्च गर्नु भन्दा उत्पादनमुलक क्षेत्र कृषिको आधुनिकरणमा लगानी गर्न माग गरे ।
भैरहवाको अन्तर्राष्ट्रिय विमानस्थलबाट प्रांगारिक कृषि उत्पादन विदेश निर्यातको समेत प्रचूर सम्भावना रहेको र प्रांगारिक कृषिलाई पर्यटनसँग जोड्न सकिने भएकाले तीनै तहका सरकारको ध्यान जानुपर्ने बताए ।
उद्यमशील टोल विकास संस्थाका अध्यक्ष घनसिंह पुनले टोललाई ‘अर्गानिक जोन’का रुपमा विकास गर्न प्रदेश सरकारले पाइलट प्रोजेक्ट सुरुवात गरेको बताए । जसअनुसार कृषि ज्ञान केन्द्रको सहयोगमा अर्गानिक तरकारी उत्पादनमा ३० घर तथा भेटेरीनरी अस्पताल तथा पशु सेवा विज्ञ केन्द्र रुपन्देहीको प्राविधिक सहयोगमा धानखेतमा हांस पालनमा २६ घर र धान खेतमा माछा पालनमा ८ घर किसान छनोट भएका छन् । टोललाई अर्गानिक उत्पादनको हब बनाउन इन्नोभेसन कृषि फार्मले स्रोत केन्द्रको रुपमा सहजिकरण गरिरहेको उनले बताए । अर्गानिक कृषिलाई पर्यटनसंग जोडेर होमस्टे सञ्चालन, फिशिङ, फुड फेस्टिबल लगायतका गतिविधि सञ्चालन गर्ने योजना रहेको छ ।
ज्योति विकास बैंक बुटवल क्लस्टर प्रमुख कपिल न्यौपानेले संस्थागत सामाजिक उत्तरदायित्व अन्तर्गत रुपन्देहीमा बैंकले पहिलोपटक किसानलाई करिब ६ लाख मूल्य पर्ने धान रोप्ने मेशिन खरिद गरेर हस्तान्तरण गरेको बताए ।
आगामी दिनमा पनि अन्य क्षेत्रमा भन्दा कृषि क्षेत्रमा उत्पादन बढाउन र मुलुकलाई आत्मनिर्भर बनाउन संस्थागत सामाजिक उत्तरदायित्व अन्तर्गतको वजेट खर्च गर्ने योजना रहेको न्यौपानेले बताए ।