खोज

घोराही १५ का लक्ष्मण अधिकारी मोटरसाईकलको राजश्व तिर्न बुधवार यातायात व्यवस्था कार्यालय तुलसीपुर पुगे । १० बजे नै कार्यालय पुगेर लाईन लागेका अधिकारीले दिउसो १ बजे बल्ल राजश्व बुझाए । लाईनमा बस्दा उनले सामान्य अवस्थाको जस्तैगरी लाईन बस्नु प¥यो । आफु सचेत हुँदाहुदैपनि यातायात कार्यालयको भिडभाडबाट उनी जोगिन सकेनन् ।

बुधबारदेखि १४ दिन क्वारेन्टिनमा बस्नुपर्ने भयो भन्दै जसरी तसरी राजश्व बुझाएर उनी फर्किए । अधिकारीका अनुसार उनी लाईन बस्दासम्म करिव ३ सय सेवाग्राहीलाईनमा थिए । लाईन बाहेकका अन्य सेवाग्राही पनि त्यत्तिकै मात्रामा रहेको उनको भनाई छ ।

अधिकारी त प्रतिनिधि पात्र मात्र हुन् । अहिले जिल्लाका धेरैजसो कार्यालयहरुमा अधिकारीले जस्तै सास्ती खेपिरहनुपरेको छ । जिल्लामा कोरोना संक्रमण बढिरहेपनि सरकारी कार्यालयमा भने नागरिकहरुको भिड लाग्ने गरेको छ । यातायात व्यवस्था कार्यालय, विद्युत प्राधिकरण, मालपोत, नापि शाखाहरुमा सेवाग्राहीहरुको भिड लाग्ने गरेको हो । सेवाग्राहीले मास्कको प्रयोग गरेपनि सामाजीक दुरी कायम नगरेका कारण भिडभाडले संक्रमणको जोखिम बढेको छ । यातायात व्यवस्था कार्यालय तुलसीपुरमा सवारी साधन कर बुझाउने सेवाग्राहीको भिड देख्दा कार्यालयमा कोरोना सकिएको जस्तो देखिन्छ । तर जिल्लामा दैनिक २० देखी माथि संक्रमितहरु भेटिदै आएका छन् ।

लुम्विनी प्रदेश सरकारले कोरोनाका कारण अशोज मसान्तसम्म राजश्वमा लाग्ने जरीमाना छुट गरेका कारण सेवाग्राहीको भिड बढेको यातायात व्यवस्था कार्यालय तुलसीपुरका निमित्त कार्यालय प्रमुख रविन्द्र केसीले बताए । कार्यालय शुरु हुनुपुर्व लाईनमा बस्दा सामाजीक दुरी कायम गर्न लगाएपनि सेवाग्राहीले नै अटेरी गर्दा भिडभाड बढेको केसी बताउछन् । कार्यालयले मात्र कोरोना संक्रमणको जोखिम कमगर्न नसक्ने भन्दै केसीले स्वयं नागरीक नै सचेत हुनुपर्ने बताउछन् । “कोरोनाको जोखिम कर्मचारीलाई मात्र त छैन, सेवाग्राहीलाई पनि छ, त्यसैले सवैले सावधानी अपनाउनु पर्नेमा सेवाग्रहीले नै अटेरी गर्छन्” केसीले भने । दैनिक ४÷५ सय सेवाग्राही आउने कार्यालयले मात्रै जोखिम कम गर्न नसक्ने उनको भनाई छ ।

दाङमा बुधवार कर्मचारी सहित ४७ जनामा कोरोना संक्रमण पुष्टि भएको छ । राप्ती स्वास्थ्य विज्ञान प्रतिष्ठान घोराहीमा गरिएको परिक्षणमा तुलसीपुर, घोराही, लमही, शान्तिनगर, गढवा र दंगीशरणका ४७ जनामा कोरोना संक्रमण पुष्टि भएको हो । संक्रमित हुनेहरुमा ७ महिनाको बच्चा देखि ५० वर्ष उमेर समुहका रहेका छन् । तुलसीपुरमा संक्रमित हुनेमा २ जना फ्लोअप र १७ जना नयाँ संक्रमित रहेका छन् । संक्रमित हुनेहरु तुलसीपुर उपमहानगरपालिका वडा नम्बर २ का १ जना, ४ का १ जना, ५ का ९ जना, ६ का २ जना, ७ का १ जना, ९ का १ जना, १२ का १ जना र १६ का ३ जना रहेको कोरोना फोकल पर्सन बिमल केसीले जानकारी दिए ।

यस्तै लमही नगरपालिका वडा नम्बर ६ का १ जना र सम्राट सिमेन्ट उद्योगका ४ जना कर्मचारी वडा नम्बर ४ का २ जना बैङकका कर्मचारी र वडा नम्बर ८ का १ जना रहेको लमहीका स्वास्थ्य शाखा अधिकृत लोकराज पौडेलले जानकारी दिए । यसैगरि गढवा गाउँपालिका वडा नम्बर २ का १ जना र ६ का १ जनामा कोरोना पुष्टि भएको गढवाका गाउपालिकाका स्वास्थ्य शाखा अधिकृत कैलास चौधरीले जानकारी दिए । घोराही उपमहानगरपालिकाका १५ जना, शान्तिनगरका २ जना, र दंगीशरणका १ जना पनि संक्रमण रहेको जिल्ला कोरोना फोकल पर्सन कमल चन्दले जानकारी दिए । उनका अनुसार दाङमा संक्रिय संक्रमितको संख्या २ सय ४३ पुगेको छ भने संक्रमितको संख्या १ हजार ३ सय ३ जना रहेको छ । यस्तै कोरोना मुक्त भई घर फर्कनेको संख्या १ हजार ५७ जना रहेको फोकल पर्सन चन्दले जानकारी दिए ।

यसैबिच दाङमा थप एक जना कोरोना संक्रमितको मृत्यु भएको छ । बाँकेको नेपालगञ्जस्थिति भेरी अस्पतालमा उपचाररत घोराही १५ का एक महिलाको निधन भएको हो । यससंगै दाङमा कोरोना संक्रमणबाट मृत्यु हुनेको संख्या ४ पुगेको छ ।