खोज

बुटवल,२३ जेठ ।   जनउत्थान बचत तथा ऋण सहकारी संस्था लिमिटेडले भैरहवामा  कार्यालय भवन निर्माण सुरु गरेको छ । लुम्बिनी प्रदेशमै सबैभन्दा धेरै शेयर सदस्य रहेको सहकारीको हाल तिलोत्तमा १५ कोटिहवामा आफ्नै केन्द्रीय कार्यालय भवन छ ।

यसअघि नै सहकारीले सिद्धार्थनगर नगरपालिका–८ स्थित शिवपथमा आफ्नै स्वामित्वको ४३ धुर जग्गामा १२ करोड लगानी गरेर अत्याधुनिक अर्को कार्यालय बनाउने योजना अघि सारेको थियो ।

तर वर्तमानको आर्थिक मन्दीका कारण ठूलो लगानीमा भवन बनाउन उपयुक्त नहुने निश्कर्षसहित सहकारीले ३७ लाख रुपैयांमा भवन बनाउन लागेको हो ।

भवनको सिद्धार्थनगर नगरपालिकाकी उपप्रमुख उमा अधिकारी र सहकारीकी अध्यक्ष ज्ञानु पौड्यालले संयुक्त रुपमा शिलान्यास गरेका छन् ।   असोजसम्म निर्माण सम्पन्न हुने लक्ष्य राखिएको उक्त भवनमा सहकारीको भैरहवा स्थित पहुँच सेवा केन्द्र पनि रहने संस्थाकी अध्यक्ष ज्ञानु पौड्यालले बताइन् ।

कार्यालय भवन शिलान्यास गर्दै नगर उपप्रमुख अधिकारीले आम सर्वसाधारणको पहुंचमा सजिलै पुग्न सक्ने सहकारी नै भएकाले यसको महत्व बढिरहेको उल्लेख गर्दै सहकारीको मूल्य मान्यता अनुसार अघि बढ्न आग्रह गरिन् ।

कार्यक्रममा जिल्ला प्रहरी कार्यालय, रुपन्देहीका प्रमुख प्रहरी उपरीक्षक भरत बहादुर वि।क।ले पछिल्लो समय सहकारी संस्थाहरुमा समस्या देखिएकाले स्थानीय सरकार चनाखो भएर अनुगमन बढाउनुपर्ने बताए ।

सिद्धार्थनगर नगरपालिका वडा नम्बर ८ का वडाअध्यक्ष राजनजंग राणाले स्थापनाकालदेखि जनउत्थान सहकारीले राम्रो काम गर्दै आएको बताए । सहकारीका उपाध्यक्ष गिरी प्रसाद पुनले उत्कृष्ट व्यवस्थापन र शेयर सदस्यको निरन्तर निगरानीका कारण संस्था यहाँसम्म आइपुगेको बताए ।
उनले शेयर सदस्यहरुको सल्लाह सुझावअनुसार अगाडि बढ्ने बताए । सहकारीकी भैरहवा पहुँच सेवा केन्द्र संयोजक शान्ति अधिकारीले शेयर सदस्यहरुको सल्लाह सुझावअनुसार संस्था अघि बढ्ने बताइन् ।

३१ जना सदस्यहरुबाट सुरु भएको सहकारीमा हाल ४० हजार जना शेयर सदस्यहरु र संस्थाको पुँजी ३ अर्ब २९ करोड र जगेडा कोषमा २४ करोड रहेको सहकारीका मुख्य प्रबन्धक रन बहादुर थापाले बताए । कार्यक्रममा जिल्ला प्रहरी कार्यालय रुपन्देहीलाई पाँच जना बेरिकेड हस्तान्तरण गरिएको थियो । त्यस्तै कार्यक्रममा ३ वटा विद्यालयलाई विद्यालय विकास अक्षयकोष, ३ वटा आमा समूहलाई आमा समूह विकास अक्षयकोष, ३ वटा युवा क्लबलाई युवा विकास अक्षयकोष, नेपाल अभिनास अनाथ आश्रम तिलोत्तमा–१४ कोटिहवालाई अनाथ आश्रम अक्षयकोष हस्तान्तरण गरिएको थियो । त्यसै गरी ७ वटा महिला समूहलाई सरसफाई सामग्री डस्टबीन हस्तान्तरण गरिएको समूहले जनाएको छ ।
कार्यक्रममा ऋण बीमा हस्तान्तरण समेत गरिएको सचिव सरु रानाले बताइन् ।