खोज

बुटवल,१८ जेठ । नेपाल मगर महिला संघ बुटवलले मगर समुदायबाट निर्वाचित जनप्रतिनिधिहरुलाई बुटवलमा अभिनन्दन गरेको छ ।
सम्मान कार्यक्रममा बोल्दै लुम्बिनी प्रदेशका सभामुख तुलाराम घर्तीले राज्यमा सबै जात जाति तथा समुदायको समान सहभागीताका लागि जोड दिएका छन् । घर्तीले आर्थिक, सामाजिक, राजनैतिक तथा साँस्कृतिक रुपमा सबै जात जाति र मुदायलाई राज्यका हरेक क्षेत्रमा समान सहभागिता लागि समान पहुँच स्थापित गर्नुपर्नेमा जोड दिए । सभामुख घर्तीले मगर समुदायको विकास र समृद्धिका लागि अब व्यवसायीक र उद्यमशिलतामा जोड दिए । राज्यका विभिन्न तहमा मगर समुदायको पहुँच वृद्धि हुँदै गएको उल्लेख गर्दै उनले अब उनीहरुबाट पाठ सिक्दै आर्थिक तथा समाजिक क्षेत्रमा थप फड्को मार्नुपर्नेमा जोड दिए । नेपालका ईतिहासमा समेत मगर मुदायले विर गोर्खालीका उपाधी प्राप्त गरेको स्मरण गर्दै उनले उनीहरुले नेपाल बचाउन देखाएको विरतालाई कायम राख्दै समय परिवेश अनुसार राजनीतिक तथा सामाजिक आन्दोलनको स्वरुप परिवर्तन गर्नुपर्नेमा जोड दिए । मगर समुदायका विर पूर्खाहरु नेपालका प्रथम प्रधानमन्त्री भिमसेन थापा, जीत गढी किल्लामा अँग्रेजलाई हराउन सफल कर्णेल उजिर सिंह थापा, प्रथम सहिद लखन थापा लगायताको योगदानलाई भुल्न नहुने उनले बताए ।

मगर महिला संघले मगर समुदायबाट वडा, गाउँ, नगर तथा प्रदेशसभामा निर्वाचित जनप्रतिनिधिहरुलाई सम्मान गर्न अभिनन्दन कार्यक्रम आयोजना गरेको थियो । सो अबसरमा लुम्बिनी प्रदेशसभाका सचिव दुर्लभकुमार पुन, लुम्बिनी प्रदेश सञ्चार प्रतिष्ठानका अध्यक्ष यमबहादुर गाहा मिलन, बुटवल उपमहानगरका प्रवक्ता शिव राना तथा वडा अध्यक्षहरु ज्ञानबहादुर रेश्मी, पदमराज गाहा, बलबहादुर पुन, नारायणप्रसाद पुन तथा चन्द्र सिंह थापा लगायतलाई सम्मान गरिएको थियो । यसैगरी वडा सदस्यहरु पम्फा थापा, पुनम थापा, मिनबहादुर सारु, राधिका थापा, धु्रव थापा, तुलबहादुर राना, सल्लाहकार रुपसिंह थापा, सकुन्तला पुन, सुन्दर तरामु लगायतलाई खादा तथा प्रमाणपत्रसहित सम्मान गरिएको थियो ।

मगर महिला संघ बुटवल नगर अध्यक्ष गोममाया थापा मगर, सचिव तिर्था सोमै राना, कोषाध्यक्ष नन्दा थापा, कुमारी थापालगायतले मगर मुदायको बिकास र उत्थानका लागि उद्यम तथा व्यवसायिकताका माध्यमबाट आर्थिक समृद्धिमा जोड दिनुपर्ने उल्लेख गरेका थिए । मगर समुदायमा भएका विभिन्न साँस्कृतिक सम्पत्तिको संरक्षण गर्दै त्यसैका माध्यमबाट आर्थिक र उद्यममा जोड्नु पर्ने उल्लेख गरेका थिए ।