खोज

कोरोना भाईरस संक्रमित बिरामीको उपचारका लागि स्थापना गरिएको बुटवल कोरोना विशेष अस्पतालमा खटिएका चिकित्सक र स्वस्थ्यकर्मीहरुले मासिक पारिश्रमिक र जोखिम भत्ता नपाएको गुनासो गरेका छन । कोरोना भाईरस संक्रमण रोक्ने फ्रन्ट लाईनरको रुपमा प्रचार गरिएका चिकित्सक र स्वस्थ्यकर्मीहरु सरकारबाट नै तोकिएको सेवासुविधा पाउनबाट बन्चित गराईएको उनिहरु बताउछन ।

अस्पतालका चिकित्सकहरु साहिल भुषाल, पुजन ज्ञवाली, प्रतिमा भण्डारी, बिशाल झा, राजेश लिम्बु, एलिसा न्यौपाने, कल्याण रेग्मी, आर्शिबाद अर्याल र सबिता अर्यालले संयुक्त रुपमा भदौ ११ गते लुम्बिनी प्रादेशिक अस्पताल ब्यवस्थापन समितिका अध्यक्षलाई ज्ञापनपत्र बुझाउदै पारिश्रमिक र भत्ता उपलब्ध गराउन आग्रह गरेका हुन । ‘हाम्रो मागलाई ब्यवस्थापन पक्षले बेवास्ता गरेको छ ।’ –एक चिकित्सकले भने । लुम्बिनी प्रादेशिक अस्पतालले करारमा नियुक्ति गरि कोरोना अस्थाई अस्पतालमा खटाएर काम लगाए पनि आफुहरुले सेवासुविधा पाउन नसकेको उनको गुनासो छ । बुधबारसम्म आफुहरुको माग पुरा नभए सेवा बन्द गर्ने उनले चेतावनी दिए । जोखिम मोलेरै फिल्डमा खटिएपनि नियमित पारिश्रमिक भुक्तानी पाउन नसकेको उनले बताए ।

नेपाल सरकारबाट कोरोनामा काम खटिने चिकित्सकहरुलाई शतप्रतिशत जोखिम भत्ता उपलब्ध गराउने निर्णय भएपनि अस्पतालले सो समेत पहिलो महिनामात्र उपलब्ध गराईएको उनले बताए । अर्कोतर्फ कोरोना नियमावली अनुसार १४ दिनको सेवापछि ७ दिन बिदाको ब्यवस्था गर्नुपर्ने भएपनि त्यो कार्यान्वन नभएको चिकित्सकहरुको गुनासो छ । कोरोना अस्पतालमा सेवा दिएर फेरि प्रादेशिक अस्पतालमा समेत खटाउने गरेको एक जना चिकित्सकले बताए । ‘हाम्रो परिवार पनि पारिश्रमिकमा आश्रित छन, कसरी चल्ने समस्या भएको छ ।’– उनले भने । अब बुधबारसम्म निर्णय नभए आफुहरु सेवा रोक्ने र थप आन्दोलनमा उभिने तयारीमा रहेको चिकित्सकहरुको तयारी छ ।

लुम्बिनी प्रादेशिक अस्पतालका अध्यक्ष सुर्य बहादुर भट्टराईले चिकित्सकहरुको माग जायज भएको बताए । जटिल अवस्थामा खटिएका चिकित्सकहरुको तलब निकासा नभएको भनी आउनुभएको र यसको समाधान हुने उनले बताए । अस्पतालका दुई जना एकाउन्टेन्टहरु पोजिटिभ हुदा उनिहरु होम क्यारेन्टिनमा रहेको उनले बताए । साउनको तलब निकासा नभएको उनले बताए । फ्रन्ट लाईनमा रहेको चिकित्सकलाई शतप्रतिशत भत्ता उपलब्ध गराउने सरकारको घोषणा अनुसार पहिलो महिना मन्त्रालयबाट निकासा भएअनुसार भुक्तानी गरिएको भन्दै थप रकम निकासका नहुदा समस्या आएको बताए । मन्त्रालयबाट असारका ३० गते पठाएको रकम अपुग भएको जानकारी गराईएको भन्दै उनले थप रकम भुक्तानीका लागि प्रदेश सरकारलाई माग गरेको बताए । प्रदेश सरकारबाट रकम निकासा नगरिए अस्पताल विकास समितिले निर्णय गरेर चिकित्सकहरुको ब्यवस्थापन गर्ने उनले प्रतिवद्धता जनाए । हाल अस्पतालमा ९ जना चिकित्सक, ६ जना एचए, करीब ४ दर्जन नर्सिङ स्टाफ र ४ जना गार्डहरुले ३ सिफटमा काम गर्दै आएका छन ।