खोज

बुटवल, ९ जेठ ।  रुपन्देही ५ बाट निर्वाचित प्रतिनिधिसभा सदस्य बासुदेव घिमिरेले गौतमबुद्ध सहित नयां बनेका विमानस्थलहरु पूर्णरुपमा सञ्चालनमा आएपछि मात्रै निजगढ विमानस्थल बनाउनुपर्ने माग सहित सरकारको नीति तथा कार्यक्रममाथि संशोधन प्रस्ताव दर्ता गरेका छन् ।
सरकारले प्रस्तुत गरेको आर्थिक वर्ष २०८०–८१ को नीति तथा कार्यक्रममा निजगढ विमानस्थल निर्माणलाई अघि बढाउने उल्लेख छ ।

अरबौं लगानीमा बनेका विमानस्थल राम्रोसंग नचल्दा निजी क्षेत्रबाट विमानस्थललाई लक्षित गरेर भएको अरबौं लगानी संकटमा परेकाले पहिला बनेका विमानस्थल पूर्णरुपमा चलाउन सरकारलाई नीतिगत दवाव दिन संशोधन प्रस्ताव दर्ता गरेको सांसद घिमिरेले बताए ।

रुपन्देहीका व्यवसायिक संघसंस्थाहरुले पनि गौतमबुद्ध विमानस्थल पूर्ण क्षमतामा सञ्चालन हुनुपर्ने माग गर्दै आएका छन् ।
यस्तै सांसद घिमिरेले बुद्ध जन्मस्थल लुम्बिनीको विकासका लागि एकीकृत लुम्बिनी समृद्धि कार्यक्रम लागु गर्न माग गर्दै संशोधन प्रस्ताव दर्ता गरेका छन् ।

‘लुम्बिनीको विकासबारे नीति तथा कार्यक्रममा झारा टराई विषय मात्र उल्लेख छ, त्यसले पुग्दैन ठोस रुपमा विकास गर्न एकीकृत लुम्बिनी समृद्धि कार्यक्रम नै चाहिन्छ’– सांसद घिमिरेले भने ।
यस्तै सांसद घिमिरेले एक पालिका एक हुलाकको सरकारको नीति समयसापेक्ष नभएकाले हुलाक कार्यालयलाई इन्टरनेट सेवा प्रदायक कार्यालयको रुपमा विकास गर्न संशोधन प्रस्ताव दर्ता गरेका छन् । घिमिरेसहित २३ जना सांसदले नीति तथा कार्यक्रम संशोधनको सूचना दर्ता गराएका छन्।
नीति तथा कार्यक्रममाथि प्रतिनिधिसभामा आज पनि छलफल जारी रहनेछ।