खोज

बुटवल,८ जेठ । अमेरिकामा रहेका नेपाली पत्रकारहरूको संस्था नेपाल अमेरिका पत्रकार संघ (नेजा) को आठौँ अधिवेशनबाट अध्यक्षमा सुरज भण्डारी निर्वाचित भएका छन् ।

यसअघि संघको महासचिव रहेका भण्डारीले आइतबार भएको निर्वाचनमा भण्डारीले ५४ मत ल्याएर विजयी हुंदा प्रतिस्पर्धी मधुकर अधिकारीले १९ मत पाएका थिए । बुटवलबाट पत्रकारिता शुरु गरेका भण्डारी बुटवल पब्लिकेशन्स प्रालिले प्रकाशन गर्दै आएको बुटवल टुडेका पुर्व सम्पादक एवं सञ्चालक हुन् ।

अधिवेशनबाट नेजाको उपाध्यक्षमा सुजन पण्डित, कोषाध्यक्षमा जानु पंगेनी, उत्तर क्षेत्रीय संयोजकमा सुपेन्द्र बस्नेत, पश्चिम क्षेत्रीय संयोजकमा रोशन अधिकारी, मध्य क्षेत्रीय संयोजकमा शंकर थापा, महासचिवमा बाबुराम दाहाल र सचिवमा प्रतिमा बास्कोटा चयन भएका छन् ।

सदस्यहरूमा केशव रेग्मी, झरना अधिकारी, ईश्वरी न्यौपाने र हेमराज बराल निर्वाचित भएको नेजाका संस्थापक अध्यक्ष तथा आठौँ अधिवेशनको निर्वाचन समितिका संयोजक गिरीश पोखरेलले जानकारी दिए । नेजामा कुल ८१ जना सदस्य रहेकोमा ७३ जना मात्रै मतदानमा सहभागी भएका थिए । अध्यक्ष वाहेक अन्य पदाधिकारी तथा सदस्यहरू निर्विरोध निर्वाचित भएका हुन् ।