खोज

बुटवल वडा नम्बर १३ को असहमति
बुटवलमा रहेका यातायात भौतिक पूर्वाधार निर्देशनलाय, यातायात व्यवस्था कार्यालय सवारी र यातायात व्यवस्था कार्यालय सवारी चालक अनुमती पत्र प्रदेश सरकारले तिलोत्तमाको मणिग्राममा सारेको छ ।
प्रदेश नम्बर पाँचको मन्त्रिस्तरीय बैठकले बुटवलमा रहेका तिनवटै कार्यालय तिलोत्तमा नगरपालिकाको मणिग्रामस्थित राममणि क्याम्पसको बिज्ञान संकायको भवनमा सार्ने निणर्य गरेसँगै सामान्य फर्निचर गरी निर्देशनालय सारिसकिएको छ । अन्य २ वटा कार्यालयले बोर्ड राखेर कोठामा पार्टेशन र फर्निचर व्यवस्थापन सुरु गर्दै छन् । आइतवार निर्देशनायको बोर्ड राखिएकोमा मंगलबार सवारी तथा सवारी चालक दुबै कार्यालयका बोर्ड राखिएको छ ।
सहसचिवको नेतृत्वमा २३ जना कर्मचारी दरबन्दी रहेको निर्देशनालयमा अहिले निमित्त निर्देशक श्याम सुन्दर मिश्र र नायव सुब्बा हुमनाथ भुसाल मात्रै हाजिर भएका छन् । एक जना कार्यालय सहयोगि करारमा नियुक्त गरी काम चलाइएको छ । मंंगलबार कार्यालयमा रहेका नायव सुब्बा भुसालले नयाँ कार्यालय भएकाले सबै कर्मचारी नआईसकेको र कार्यालय व्यवस्थापनमा नै लागेको बताए ।
राममणि क्याम्पसको बिज्ञान संकायको उक्त भवनको पहिलो र दोश्रो तल्लामा सवारी र सवारी चालक अनुमति कार्यालय र तेश्रो तल्लामा निर्देशनालय स्थापना गरिएको छ ।
कार्यालयको पार्टेशन कसरी गर्ने, कोठाको व्यवस्थापन र फर्निचर कसरी मिलाउने भन्ने सम्बन्धमा दुबै कार्यालयका अधिकृत तथा नायव सुब्बास्तरका कर्मचारीहरूले मंगलबार भवन तथा कोठाहरूको अवलोकन गरी सामान्य खाका तयार गरेका छन । यातायात व्यवस्था कार्यालय सवारीका निमित्त कार्यालय प्रमुख मुक्तिप्रसाद पाण्डेले प्रदेश सरकारको निणर्य अनुसार कार्यालय स्थानान्तरण गर्न लागेको र पार्टेशन फर्निचर लगायतका काम सकेर सकेसम्म छिटो मणिग्राम कार्यालयबाट सबै काम सुरु गर्ने जानकारी दिए । उनले भने–‘मन्त्री ज्युबाट छिटो काम गर्नुस भन्नु भएको छ ।’
पार्टेशन फर्निचर व्यवस्थापन र कागजात स्थानान्तरण गर्न केही समय लाग्ने भएकाले मंसिर अन्तिम साता वा पुसको पहिलो साता कार्यालय पुर्ण रूपमा सर्ने छ । यातायात व्यवस्था कार्यालय सवारी कार्यालयमा २८ कर्मचारीको दरवन्दी रहेकोमा २५ जना कार्यरत रहेका छन ।
सवारी चालक अनुमति कार्यालयका प्रमुख बिपीन क्षेत्रीले अन्य कार्यालयलाई स्थानान्तरणमा सहज नभएको बताए । उनले बोर्ड राखिसकेको र अव पार्टेशन तथा अन्य तयारीका काम गर्ने तर प्रबिधि स्थानान्तरण गर्न गाह्रो हुने भएकाले संघिय मन्त्रालयसंग पनि समन्वय गर्नु पर्ने बताए । जनतासंग प्रत्यक्ष सरोकार राख्ने कार्यालय मणिग्राममा आएपछी स्थानीय उत्साहि भएका छन् ।
मणिग्रामका कृष्ण पाण्डेले प्रदेश मन्त्रालय आउने चर्चा भएर नआएपनि यातायात सम्वन्धि कार्यालयहरू आउदा मणिग्रामको चहल पहल बढने बताए । उनले तिलोत्तमा नगरपालिकामा प्रदेशका अन्य कार्यालयहरू पनि ल्याउन पहल गर्नुपर्ने बताए ।
यसैबिच बुटवल उप–महानगरपालिका वडा नम्वर १३ का जनप्रतिनिधिहरूले यातायात व्यवस्थासंग सम्वन्धित कार्यालय राख्न आफनो वडामा ३ बिगाहा १५ कठ्ठा जग्गा हस्तान्तरण भइसकेपछि अन्यत्र लैजानु आपत्तिजनक भएको बताएका छन । वडाअध्यक्ष नारायण प्रसाद पुन, कार्यपालिका सदस्य बिष्णुदेबि शर्मा पौडेल, वडा सदस्यहरू बेद प्रसाद गैरे, खुमानन्द पौडेल र सरस्वति परियारले मंगलवार एक बिज्ञप्ति प्रकाशित गरी एक ठाउमा जग्गा हस्तान्तरण गर्न लगाएर अन्यत्र लैजानु जनताप्रति अपमान भएको उल्लेख गरेका छन् ।