खोज

रूपन्देहीमा जारी दोस्रो तिलोत्तमा प्रिमियर लिग क्रिकेट प्रतियोगिताका उपाधि शक्ति गौचनको प्रशिक्षणमा रहेको टिम लुम्बिनी कासाई ग्लाडियटरले हात पारेको छ । तिलोत्तमा नगरपालिकास्थित नवजिवन खेलमैदानमा शनिबार भएको फाईनल खेलमा रोयल शंकरनगरलाई ६१ रनले पराजित गर्दै लुम्बिनी कासाईले उपाधि चुमेको छ ।
उपाधिसंगै लुम्बिनीले नगद ३ लाख, मेडल, प्रमाणपत्रबाट पुरस्कृत भएको छ । यसैगरि उपविजेतामा चित्त बुझाएको शंकरनगर नगद १ लाख ५० हजार, मेडल र प्रमाणपत्रबाट पुरस्कृत भएको छ । अनुभवि राष्ट्रिय टिमका सदस्य रहेका शक्ति गौचनको अनुभव र विश्वास युवा खेलाडीहरूले खेलमा पस्कन सक्दा जित हासिल गर्न सफल रहयो । प्रतियोगितामा म्यान अफ दि सिरिज शंकरनगरका रोहित पौडेल घोषित हुदै नगद २० हजार, बेष्ट ब्याट्सम्यान मणिग्रामका सन्दिप रजालि नगद १० हजार, बेष्ट बलर लुम्बिनी कासाईका रूपेश कुर्मी नगद १० हजार तथा प्रतियोगितामा बेष्ट फिल्डर बुटवल डाईनामाईटका देव खनाल, फाष्टेड फिफटी आरसी भैरहवाका सोनु तामाङ, ईमरजिङ्ग प्लेयर बुटवलका अभिषेक गौतम घोषित हुदै नगद ५ हजारबाट पुरस्कृत भएका थिए ।
निक्कै रोमाञ्चक खेलमा टस जितेर रोयल शंकरनगरले लुम्बिनीलाई ब्याटिङग निम्तो दिएको थियो । लुम्बिनीले निधारित २० ओभरमा ८ विकेट गुमाएर १ सय ४६ रनको लक्ष्य खडा गरेको थियो । पहिलो ओभरमा नै ओपनर राजु साहनी रोहितको बलमा आउट भएका थिए । सुनिल धवल १० बलमा ९ रनको स्कोरमा सुसान्त भारीको बलमा बोल्ड भए । तेस्रो नम्बरमा मैदान छिरेका पुरन बिक २ बल खेल्दै शुन्यमा आउट भए । सन्दिप सुनारले बिकलाई बोल्ड गरे । लगातार विकेट गुमाएर धरमराएको लुम्बनीलाई भिम सार्कीले सम्हाले । सार्कीले ३५ बलमा ६३ रनको जोड्दै टिमलाई सम्मानजनक स्कोरमा लगेका थिए । शंकरनगरका रोहित पौडेल र सन्दिप सुनारले समान २–२ विकेट लिएका थिए । मध्यम लक्ष्य पछ्याएको शंकरनगरका ब्याट्सम्यानहरू लुम्बिनीका बलर सामु खुलेर खेल्न सकेनन ।
लिगमा उत्कृष्ट प्रर्दशन गरेका सन्दिप सुनार फाइनलमा चल्न सकेनन । ओपनर सुनिल कुमार ६ बलमा १२ र सन्दिप सुनार ११ बलमा केवल ८ रन बनाएर आउट भए । दुबैलाई लुम्बिनीका कुशल मल्लले आउट गरेका थिए । शंकरनगरका रोहित पौडेल २२ बलमा २२ र रोबिन क्षेत्रीले १० रन बाहेक अन्य ब्याट्सम्यानले दोहोरो रन जोड्न सकेनन । शंकरनगर १६.४ ओभरमा केवल ८५ रनमा समेटिएका थिए । कम स्कोरमा रोक्न लुम्बिनीका रूपेश कुर्मीले २.४ ओभर बलिङ गर्दै १३ रन खर्चेर २ विकेट लिएका थिए । यसैगरि कुशल मल्ल र महेशपति समान २–२ विकेट लिएका थिए । खेलमा लुम्बिनीका भिम सार्की म्यान अफ दी म्याचबाट पुरस्कृत भएका थिए ।
एक समारोहका बिच प्रदेश न ५ का उधोग पर्यटन वन तथा वातावरणमन्त्री लिला गिरि, रूपन्देही किकेट संघका अध्यक्ष प्रशान्त विक्रम मल्ल, तिलोत्तमा किकेट विकास समितिका अध्यक्ष अच्युतराज ढुङ्गाना, बुटवल किकेट विकास समितिका अध्यक्ष नेत्र पौडेल, समितिका उपाध्यक्ष रोमित बज्राचार्यले विजेता, उपविजेता, उत्कृष्ट खेलाडीहरूलाई पुरस्कार वितरण गरेका छन् । à