खोज

नेपाली सेनाको श्री १९ नम्बर बाहिनी अड्डा तुलसीपुरले आर्थिक अनियमिता गर्ने ३ जनालाई बर्खास्त गर्दै तीन महिनाको कैद फैसला सुनाएको छ । नयाँ सेनाको भर्ना अभियानका क्रममा जागिर लगाईदिने भन्दै रकम अशुलेको आरोपमा जमदार सहित ३ जनालाई बर्खास्त गरेको हो ।

बाहिनी अड्डाका बाहिनीपति तथा सहायक रथी विज्ञानदेव पाण्डेको अध्यक्षतामा गठित समरी जनरल सैनिक अदालले बर्दिया जिल्ला साविकको सानोश्री गाविस ८ घर भई ज्वालादल गण जाजरकोटमा कार्यरत जमदार नरेन्द्रबहादुर डाँगी, बाँकेको बैजनाथ गाविस–१ चिसापानी घर भई सोही गणमा कार्यरत हवल्दार कुलबहादुर राना क्षेत्री र गोर्खाको पालुङटार नगरपालिका २ घर भएका सिपाही दिनेश अधिकारीलाई सेवाबाट बर्खास्त गर्दै कैद फैसला सुनाएको होे । (आर्थिक अनियमितता गरेको स्वीकार गरेपछि सैनिक अदालतले डाँगी र अधिकारीलाई ३/३ महिना र रानालाई एक महिना कैद गर्ने फैसला गरेको नेपाली सेनाका प्रवक्ता साहयक रथी गोकुल भण्डारीले जानकारी दिएका छन् । सैनिक हित विपरित कार्य गर्नेलाई सैनिक ऐन २०६३ को दफा ५२ को खण्ड ६ बमोजिम सैनिक अदालतले कारबाही गर्न सक्ने कानुनि व्यवस्था छ । प्रवक्ता भण्डारीका अनुसार उनीहरूलाई सैनिक हित विपरीत काम गरेको पाईएकोले कानुन अनुसार कारवाही गरीएको हो ।

नेपाली सेनामा भर्ना गराईदिने भन्दै जमदार डाँगीले डेढलाख रूपैयाँ लिएको, हलवदार रानाले आफ्नो गाउँको ब्यक्ति भन्दै सघाएको र सिपाही अधिकारीले भर्ना भएपछि ५० हजार रूपैयाँ लिने कबुल गरेका थिए । ज्वालादल गण जाजरकोटमा गत जेठ २ गते नेपाली सेनामा भर्ना खुलेको थियो । भर्ना छनौटको मौखीक अन्र्तवार्तामा सोधपुछ गर्ने क्रममा आर्थिक लेनदेन गरेको कुरा खुल्न आएको हो । नेपाली सेनामा भर्ना हुन आएका मध्ये एक जनाले डेढ लाख रूपैयाँ दिइसकेको र एक जनाले भर्ना भएपछि ५० हजार दिने कबुल भएको कुरा खुलेपछि घटना सार्वजनिक भएको हो । यद्यपी पैसा खाएको खुलेपछि डाँगीले पैसा फिर्ता गरिसकेका थिए । कात्तिक ५ गते उनीहरूलाई नियन्त्रणमा लिएर सैनिक अदालतले अनुसन्धान सुरु गरेको थियो