खोज

शनिबारदेखि दोस्रो संस्करणको तिलोत्तमा प्रिमियर लिग क्रिकेट प्रतियोगिता शुरु भएको छ । तिलोत्तमा क्रिकेट विकास समितिको योजनामा भएको उद्घाटन खेलमा रोयल शंकरनगर विजयी भएको छ । शंकरनगरले रोयल च्यालेन्जर भैरहवामाथि ८ विकेटको जित निकालेको हो । यसैगरि शनिबार नै भएको दोस्रो खेलमा मणिग्राम किङ्गले नुसी वरियर्स मणिग्राममाथि ६ विकेटको जित निकालेका हो । तिलोत्तमा नगरपालिका वडा नम्बर ६ स्थित नवजिवन क्लवको खेल मैदानमा भएको पहिलो खेलमा रोयल शंकरनगरले टस जितेर फिल्डिङ्ग रोजेको छ ।
ब्याटिङ्गको निम्तो पाएको रोयल च्यालेन्जर भैरहवाले निर्धारित २० ओभरमा सबै विकेट गुमाएर १ सय २३ रनको लक्ष्य खडा गरेको थियो । उसका लागि सन्दिप केसीले २ छक्का र २ चौकाको मद्यतले २९ तथा धिरज शाहीले २ छक्का र ३ चौकाको मद्यतले २९ रनको योगदान दिएका थिए । कम स्कोरमा रोक्न रोयल शंकरनगरका रोहित पौडेलले ४ ओभरमा २३ रन खर्चेर ४ विकेट लिएका थिए ।
यसैगरि नितेश थापा र सुशान्त भारीले समान २–२ विकेट लिएका थिए । शंकरनगरले १२.१ ओभरमा केवल २ विकेटको नोक्सानीमा जित हासिल गरेको थियो । शंकरनगरको जितमा सुनिल कुमार सार्कीले विष्फोटक ब्याटिङ्ग गरे । उनले २ छक्का र ४ चौकाको मद्यतले ४३ रन बनाएका थिए । सन्दिप सुनारले ३१ तथा बिशाल खत्रीले नटआउट ३६ रन जोडेका थिए । खेलमा शंकरनगरको जितमा ४ विकेट लिएका रोहित पौडेल म्यान अफ दी म्याचबाट पुरस्कृत भएका थिए ।
यसैगरि दोस्रो खेलमा नुसी वरिर्यसले टस जितेर निर्धारित २० ओभरमा केवल २ विकेटको नोक्सानीमा १ सय ६२ रनको लक्ष्य खडा गरेको थियो । मध्यम लक्ष्य पछ्याएको मणिग्राम किङ्गले अन्तिम ओभरको पहिलो बलमा ४ विकेटको नोक्सानीमा जित निकाल्यो । मणिग्राम किङ्गका अमर सिह रौत्यालाले विष्फोटक ब्याटिङ्ग गरेका थिए । उनले खेलमा ६ छक्का र १ चौकाको मद्यतले ४३ रन बनाए । सन्दिप रजालीले ३७ र इमरान खानले ३५ रनको योगदान दिएका थिए ।
नुसीका कुशल भुत्रेलले २ तथा यम क्षेत्री र अर्जुन रायमाझीले १–१ विकेट लिएका थिए । नुसीका दुई जना खेलाडीले प्रतियोगितामा अर्धसतक पुरा गरेपनि जित निकाल्न सकेनन । ओपनर ब्याट्सम्यान महेश रानाले नटआउट ५५ रन बनाए । यसैगरि अजय कौशिकले १ छक्का र ७ चौकाको मद्यतले ५३ रन बनाए । दिपेन्द्र ऐरीले २ छक्का र ३ चौकाको मद्यतले ३२ रन जोडेका थिए । प्रतियोगितामा मणिग्राम किङ्गका अमर सिह रौत्याला म्यान अफ दी म्याचबाट पुरस्कृत भएका छन ।
आईतबार पहिलो खेलमा ज्ञानोदय गोल्डस र लुम्बिनी कसाई तथा दोस्रो खेलमा एसआर एनसीएसए टाईर्गसले बुटवल डाईनामाईट्ससंग प्रतिस्प्रर्धा गर्ने छ । प्रतियोगिताको उपाधि बिजेता टिमले ट्रफिसहित नगद ३ लाख, मेडल र प्रमाणपत्र प्राप्त गर्नेछन भने उपबिजेताले ट्रफिसहित नगद १ लाख ५० हजार, मेडल र प्रमाणपत्र प्राप्त गर्ने छन ।
एक कार्यक्रमका बिच तिलोत्तमा नगरपालिकाका नगरप्रमुख बासुदेव घिमिरेले ब्याटिङ्ग र राष्ट्रिय टिमका प्रशिक्षक जगत टमाटाले बलिङ्ग गर्दै प्रतियोगिताको उद्घाटन गरेका छन । कार्यक्रममा बोल्दै नगरप्रमुख घिमिरेले खेलपूर्वधारलाई प्राथमिकतामा राखेर नगरपालिकाबाट कार्ययोजना तयार गरेको बताए । प्रतियोगिता संचालन गर्न यस वर्ष १० लाख सहयोग समेत गर्ने प्रतिवद्धता जनाउदै स्थाई अन्तराष्ट्रियस्तरको मैदान बनाउन नगरपालिकाले जग्गा छनौट गरि काम अघि बढाएको समेत बताए । कार्यक्रममा राष्ट्रिय टिमका प्रशिक्षक जगत टमाटाले रूपन्देही क्रिकेटको उर्वरभुमि भएको भन्दै प्रत्येक वर्ष राष्ट्रिय टिममा खेलाडी दिन सफल भएको बताए । पूर्वाधार विकासमा सरकारले लगानी गरे यो क्षेत्रबाट अझ धेरै खेलप्रतिभाहरू जन्मने समेत उनले बताए । प्रतियोगितालाई खेलाडीहरूले प्लटर्फमका रूपमा लिनुपर्ने भन्दै उनले यसको सदुपयोग गर्न सुझाव दिए । प्रतियोगितालाई सानो र ठुलो भन्दा पनि खेलाडीले आफनो स्किल देखाउने रूपमा लिनुपर्ने बताए । खेलाडीले नेपाल क्रिकेटलाई उचाईमा लैजान देशभर संचालन हुने प्रतियोगिताले मद्यत मिल्ने उनले बताए । रूपन्देही क्रिकेट संघका जिल्ला अध्यक्ष प्रशान्त विक्रम मल्ल, तिलोत्तमा क्रिकेट बिकास समितिका अध्यक्ष अच्युतराज ढुंगाना, खेल संयोजक दिपक भ्रुतेलले खेल विकासमा सबैको साथ जरुरी रहेको बताए ।à