खोज

उडान भर्दै बन्द हुँदै गरेको तुलसीपुरको टरीगाउँ विमानस्थलमा अहिले नियमित उडान भैरहेको छ । ईन्धन डिपोको कारण देखाउँदै केही समय सञ्चालनमा आउँदै बन्द हँुदै गरेको टरीगाउँ विमानस्थलमा अहिले नेपाल वायुसेवा निगमले काडमाडांै, भैरहवा, दाङ हवाईसेवा सञ्चालनमा ल्याएको हो । साताको दुईदिन उडान भर्ने सहमति भएपनि अहिले नेपाल वायुसेवा निगमले सातामा तीन दिन उडान भर्दै आईरहेको छ ।
यसभन्दा अगाडि सोमबार र शुक्रवार नियमित उडान हुँदै आएकोमा मंसिर १ गतेदेखि लागू हुने गरी वुधबार समेत थप गरेर सातामा तिन दिन उडान हुन लागेको नेपाल वायुसेवा निगमका प्रवक्ता अशोक सिग्देलले जानकारी दिएका छन् ।
यात्रुहरूको चापका कारण साताको दुईदिनले मात्र नहुने भन्दै अहिले नेपाल वायुसेवा निगमले थप एकदिन उडान भर्न लागेको जनाएको छ । ‘यात्रुको माग भए बमोजिम हामीले तुलसीपुर उप–महानगरपालिकासँग सहकार्य गरेर उडान थप गरेका हौ’ प्रवक्ता सिग्देलले भने । मंसिर महिनाभरमा यात्रुको चाप र माग भए पुस महिनाबाट दैनिक हवाई सेवा सञ्चालनका लागि निगमले तयारी गरिरहेको नेपाल वायुसेवा निगमका कमर्सियल विभाग प्रमुख टंकनिधि दाहालले बताए । ‘हामीले दैनिक उडान हुँदा यात्रुसंख्या पुग्ने अवस्था हुने भयो भने नियमित उडान गर्नेछौं’ दाहालले भने ।
लामो समय बन्द रहेको हवाइ सेवा सञ्चालनसँगै राप्तिका नागरीकमा पनि उत्साहको छाएको छ । ‘अचानक काठमाडौं जानुपर्ने काम परेको थियो यहीबाट टिकट पाइपछि साह्रै खुसी लाग्यो’ दाङ तुलसीपुरका स्थानीयबासी घनश्याम लामिछानेले बताए । उप महानगरपालिकाले नेपाल एयरलाइन्सको सहकार्यमा हवाईसेवा सञ्चालन गरेसँगै अशक्त र बिरामीहरूले ठूलो राहतको महसुस गरेका छन् । ‘चेक गराउन काठमाडौ जाउँ भनेको गाडीमा यात्रा गर्न साह्रै गाह्रो थियो तर तुलसीपुरबाटै टिकट पाएपछि सजिलो भयो’ पत्रकार नारायणप्रसाद शर्माले खुसी व्यक्त गरे । उनले हवाइसेवा दैनिक सञ्चालन भएमा सबैले सुविधा लिन पाउने धारणा व्यक्त गरे । तिहारको दिन टिका लगाएरै सोही दिन काठमाडौ जान पाएकोमा काठमाडौ घर भएकी निर्मला गिरीले पनि खुसी व्यक्त गरिन् । ‘साइतमै टिका लगाएर घर जान पाइयो यस्तै सेवा सधै भए सजिलो हुने उनको भनाई छ ।
तुलसीपुरमा नै यात्रुको संख्या पुरा भएपछि नेपाल एयरलान्सले अहिले तुलसीपुर काठमाडौ सिधा हवाइ सेवा सञ्चालन गरिरहेको छ । इन्धन समस्याका कारण विमानको क्षमता अनुसार यात्रु वोक्न नसकिए पनि एक दुइ जना कम गरेर धेरै जसो डाइरेक्ट उडान गरिरहेको क्याप्टेन उद्धव घिमिरेले वताए । यात्रुको चाप भएका दिन भैरहवाहुदै काठमाडौं जाने गरेको उनको भनाई छ । दाङ भैरहवा काठमाण्डौ उडानहुँदा पनि दाङवासीले खुसी व्यक्त गरेकाछन् । बुटवल तथा भैरहवामा काम परेमा पनि हवाईसेवा लिनपाईनेमा प्राय व्यवसायीहरूले खुसी व्यक्त गरेकाहुन् । हवाइ सेवा नियमित भए यात्र ुसंख्यामा कमी नहुने तुलसीपुर उद्योग वाणिज्य संघका निवर्तमान अध्यक्ष विमल रिजालले वताए । ‘नेपालगञ्ज र भैरहवा जानेको अनुपात हेर्ने हो भने दैनिक दुई वटा पनि उडान भर्न सकिन्छ’ रिजालले भने । नेपालगञ्ज र भैरहवा जानका लागि समय र पैसाको खर्च धेरै हुने भएको हुँदा तुलसीपुरबाट विमान सेवा लिनेहरू धेरै हुने उनको भनाई छ ।
टरीगाँउ विमानस्थल सञ्चालनसँगै यात्रु सुविधाका लागि सुविधा सम्पन्न टर्मिनल भवन वन्ने भएको छ । भवन निर्माणका लागि केन्द्रबाट वजेट विनियोजन भइसकेको र तत्काल निर्माण प्रक्रिया अगाडि वढाइने तुलसीपुर उप महानगरपालिकाका नगरप्रमुख घनश्याम पाण्डेले जानकारी दिए । ‘टर्मिनल भवनका लागि सरकारले वजेट विनियोजन गर्नुले पनि विमान सेवा नियमित हुने अपेक्षा गर्न सकिन्छ’ पाण्डेले भने । उनले अस्थायी इन्धन डिपोको लागि सरकारले निर्णय गरिसकेको जानकारी दिँदै अन्य प्रक्रिया समेत अगाडि वढिसकेको वताए ।