खोज

एभरेष्ट कप राष्ट्रिय जुनियर छात्रा भलिवल प्रतियोगिता बिहीबारबाट बुटवलमा सुरु भएको छ । जुनियर छात्रा खेलाडीहरुलाई प्लटफर्म दिने रुपमा एभरेष्ट माध्यमिक विद्यालय बुटवलको आयोजनामा प्रतियोगिताको पहिलो दिन १० वटा खेलहरु भएका छन् ।
बिहीबार भएको उद्घाटन खेलमा आयोजक एभरेष्ट माविले सगरमाथा माविलाई २–० को सोझो सेटमा पराजित गर्दै क्वाटरफाईनलमा प्रवेश गरेको छ । वेष्ट अफ थ्रिमा खेलाईको खेलको पहिलो सेट एभरेष्टले २५–२ अंकले र दोस्रो सेट २५–५ को अंकले सगरमाथालाई पराजित गरेको हो ।
यसैगरि खेलमा विहिबार नै भएको लिग खेलमा काभ्रे जिल्ला भलिवल संघलाई आयोजक एभरेष्ट मावि, सुदुरपश्चमाञ्चल एकेडेमि कैलालीले रुद्रपुर पिसल्याण्ड भूपु सैनिक रुपन्देही, जानकी माध्यमिक विद्यालय चितवनले सगरमाथा मावि, थ्रीस्टार एकेडेमी काठमाण्डौले वीसडम एकेडेमी कञ्चनपुरलाई पराजित गर्दै दोस्रो चरणमा प्रवेश गरेका हुन । सिद्धमावि दाङले नवज्योति मावि रुपन्देही र ज्ञानज्योति मावि बाँकेले प्यारामाउण्ट मावि काठमाण्डौलाई पराजित गरेका छन् । यस्तै न्यू डायमण्ड एकेडेमी काठमाण्डौ र टप्स मावि कास्कीले वाक ओभर पाएर विजयी भएका छन् । प्रतियोगिता अन्तरगत विहिबार पहिलो चरणका खेलहरु सम्पन्न भएका तथा दोस्रो चरणका खेलहरुमा शुक्रबार प्रि क्वाटर फाईनल र क्वाटर फाईनलका खेलहरु हुने प्रतियोगिता संयोजक अर्जन घिमिरेले बताए ।
प्रतियोगिताको एक कार्यक्रमको बिच उद्घाटन गर्दै नेपाल भलिवल संघका केन्द्रीय अध्यक्ष मनोरञ्जन सरण शर्माले भलिवल खेल नेपालको राष्ट्रिय खेल भएपनि त्यसको विकासमा सरकार उदार नदेखिएको बताए । तीन तहकै सरकारले खेलक्षेत्रको दीर्घकालिन योजनासहित विकासको खाका तयार गर्नुपर्ने बताए । भलिवलको विकासका लागि संघका तर्फबाट छात्रा भलिवलका लागि ५० हजार सहयोगको उनले प्रतिवद्धता समेत जनाए । एभरेष्ट मावि विद्यालय संचालक समितिका अध्यक्ष गमप्रसाद रेश्मी, हिसान रुपन्देहीका अध्यक्ष कृष्ण पौडेल, प्याब्सन बुटवल नगर समितिका अध्यक्ष कुलराज शर्मा, विद्यालयका प्रिन्सिपल कृष्ण न्यौपाने, बरिष्ठ सहायक प्रिन्सिपल माधव आचार्य, शिक्षक माधव पौडेलले भलिवलको विकासमा सबैको सहयोग र सहकार्य आवश्यक रहेको बताए । कार्तिक १७ गतेसम्म चल्ने प्रतियोगितामा काठमाडौं, बुटवल, पोखरा, दाङ, धनगढी, नेपालगञ्ज, कञ्चनपुर, चितवन, काभ्रे र रुपन्देहीका गरी १६ समूहले प्रतिस्पर्धा गर्ने छन् ।