खोज

प्रदेश नं. ५ का मुख्य मन्त्री शंकर पोख्रेलले व्यापार व्यवसायबाट आएको आम्दानीलाई कृषि क्षेत्रमा लगानी गर्न सके समाजको आर्थिक स्तर सुदृढ हुने बताएका छन् ।
रूपन्देहीको सैनामैना व्यापार संघले आयोजना गरेको तेस्रो राष्ट्रिय सैनामैना कृषि, पर्यटन तथा औद्योगिक मेलाको उद्घाटन गर्दै मुख्यमन्त्री पोखरेलले देश एकात्मक राज्य व्यवस्थाबाट संघीय व्यवस्थामा जाँदा थुप्रै चुनौतिहरूको सामना गर्नु परेको बताए ।
देश बलियो भएमात्र जनताको आर्थिक स्तरबृद्धि हुने बताउँदै मन्त्री पोखरेलले सामाजिक संघ–संस्थाको सहयोग र सहभागिताका साथमा साझा विकासका एजेण्डा बनाएर अगाडि बढ्नु पर्ने जिकिर गरे । मन्त्री पोखरेलले पछिल्लो तीन महिनामा प्रदेश सरकारले परिणाममुखी काम गर्न नसकेपनि प्रयास भैरहेको र यसको गुणात्मक परिणाम जनताले छिट्टै महसुस गर्न पाउने दाबी गरे ।
मेला उद्घाटन कार्यक्रममा राष्ट्रिय सभा सदस्य खिमलाल भट्टराईले मेला महोत्सवले कृषि क्षेत्रको आधुनिकीकरण गर्नका लागि आफ्नो सहयोग र पहल निरन्तर रहने बताए । त्यसैगरी प्रदेश सभा सदस्य फकरुद्दिन खाँले स्थानीय व्यापार मेलाहरूलाई अवसरका रूपमा लिएर यसबाट हुने फाइदा सबै वर्गले लिन सक्ने बतावरण बनाउनु पर्ने बताए ।
त्यस्तै सैनामैना नगरपालिकाका नगरप्रमुख चित्रबहादुर कार्कीले मेला महोत्सवहरूमा स्थानीय मौलिक र पौरख देखाउने खालका स्टलहरूको समावेश गरेर मात्र मेला सञ्चालन गर्ने बताए । कार्यक्रममा नेकपा जिल्ला प्रतिनिधि निर्मल जि.सी., तिलोत्तमा व्यापार संघका अध्यक्ष झविन्द्र कडेल, सैनामैना उद्योग वाणिज्य संघका अध्यक्ष राजबहादुर क्षेत्री, नेपाली कांग्रेश जिल्ला उप सभापति फणिन्द्र प्रसाद शर्मा, संस्थाका बरिष्ठ उपाध्यक्ष दिपक कुमार चालिसे महासचिब देवराज पौडेल लगायतले मेला महोत्सवले कृषकहरूलाई प्रोत्साहन गर्ने बताएका थिए । देश निर्माणमा व्यापारको आवश्यकता, व्यवसायिक हितसँगै सामाजिक एकता भन्ने मूल नाराका साथमा सुरु भएको महोत्सव कार्तिक १८ गते सम्म सञ्चालन हुने महोत्सवका संयोजक जीवनाथ पाण्डेले जानकारी दिए ।