खोज

बुटवल,  पुस
तिलोत्तमामा सम्पन्न तिलोत्तमा मेयर कप क्रिकेट प्रतियोगिता २०७९ को उपाधि वडा नं १ चुमेको छ । विहिबार भएको फाईनल खेलमा वडा नं ४ लाई ७ विकेटले पराजित गर्दै वडा नं १ उपाधि चुमेको हो । उपाधिसंगै वडा नं १ का खेलाडीहरुले नगद ५० हजार रुपैया, कप, मेडल, प्रमाणपत्रबाट पुरस्कृत भएको छ । उपविजेता वडा नं ४ का खेलाडीहरु भने नगद २५ हजार रुपैया, कप, मेडल, प्रमाणपत्रमा चित्त बुझायो । प्रतियोगितामा वडा नं २ का महेन्द्र सुवेदी क्षेत्री सर्वोत्कृष्ट खेलाडी घोषित हुँदै नगद १० हजार, कपबाट पुरस्कृत भए । क्षेत्री उत्कृष्ट ब्याट्सम्यान घोषित हुँदै थप ५ हजार रुपैया, कप तथा वडा नं ४ का बिरेन प्रकाश मगर उत्कृष्ट बलर घोषित हुँदै नगद ५ हजार रुपैया, कपबाट पुरस्कृत भए ।
एक समारोहका बिच तिलोत्तमा नगरपालिकाका नगरप्रमुख रामकृष्ण खाड, वडा नं १ का वडाअध्यक्ष फर्सुराम गिरि, वडा नं २ का वडाअध्यक्ष दिल बहादुर भट्टराई, ३ का वडाअध्यक्ष कल्याण पौडेल, वडा नं ४ वडाअध्यक्ष हरि बहादुर क्षेत्री, वडा नं ६ का वडाअध्यक्ष गणेश पाठकले विजेता, उपविजेता टिम तथा उत्कृष्ट खेलाडीहरुलाई पुरस्कार वितरण गरेका छन । तिलोत्तमा नगरपालिकाका नगरप्रमुख रामकृष्ण खाडले वडामा रहेका युवा खेलाडीहरुलाई प्रतियोगिताबाट प्लेटफर्म मिल्ने बताए । नगरका खेलाडीहरुमा खेलभावना र प्रतिस्पर्धासंगै भाईचारा, अपनत्व बढाई संगठित बनाउन खेल प्रतियोगिता सहयोगसिद्घ हुने उनले बताए । यसबाट समाज विकासमा योगदान मिल्ने उनले दाबी गरे । सिमित साधनश्रोतबाट प्रतियोगिता गर्दा केही कठिनाईहरु हुने भएपनि मुलमर्मलाई भुल्न नहुने बताए । नगरमा भौतिक पुर्वाधारसंगै सामाजिक विकासलाई समानान्तर लैजान जरुरी रहेको उनले बताए । नगरमा रहेका धेरै क्लबहरु र संघसंस्थाहरुले सार्वजनिक जग्गा संरक्षणसंगै मनोरञ्जन र खेल पुर्वाधार विकास भएको उनले बताए ।
तिलोत्तमा नगरपालिकाको आयोजना तथा नवजिवन क्लबको सहआयोजनामा नवजिवन खेल मैदानमा भएको फाईनल खेलमा वडा नं ४ ले निर्धारित २० ओभरमा सबै विकेट गुमाएर ५९ रनको लक्ष्य खडा गरेको थियो । वडा नं ४ का अजय थापाले ५२ बलमा २८ बाहेक अन्य कुनै ब्याट्सम्यानले दोहोरो अंकको रन जोड्न सकेनन । कम स्कोरमा रोक्न तिलोत्तमा वडा नं १ का विपिन भट्टराई र गणेश गुरुङले समान ३–३ विकेट लिएका थिए । कम स्कोर पछ्याएको वडा नं १ ले १८.५ ओभरमा ३ विकेटको नोक्सानीमा जित हासिल गरेको थियो । उसका लागि प्रवेश सारुले ४५ बलमा २४ र युवराज सेनले ३० बलमा १६ रन बनाएका थिए । वडा नं ४ का सुलभ ढुगानाले २ तथा सुजन न्यौपानेले १ विकेट लिएका थिए । खेलमा वडा नं १ का विपिन भट्टराई म्यान अफ दी म्याचबाट पुरस्कृत भए ।
कार्यक्रममा रुपन्देही क्रिकेट संघका सदस्य श्रीराम नेपाली, नवजिवन क्लबका अध्यक्ष गोबिन्द भुषाल, सचिव सागर पाठक, नवजिवन क्लबका सल्लाहकार दिवाकर ढकालले खेल जितसंगै स्वस्थ्य नागरिक उत्पादन गर्ने लक्ष्यका साथ आयोजना हुने हुदा यसमा स्थानिय सरकारको लगानी र प्रोत्साहन सधै जरुरी रहने बताए । नगरमा रहेका क्लबहरुलाई पुर्वाधार विकास र प्रतियोगिता संचालन गर्न बजेट बिनियोजन गर्दै आएको उनले बताए । कार्यक्रम संयोजक प्रकाश न्यौपानेले स्थानिय सरकारसंग सहकार्य गरि खेलकुद विकासमा संस्थागत पहल थालेको बताए । नौ दिनसम्म संचालन भएको १४ खेलमा वडा नं १२ र १५ बाहेक १५ टिमले भाग लिएको थियो ।