खोज

रूपन्देहीको मंगलापुरमा जारी ३२ औं झरना रनिङ्ग शिल्ड नकआउट फुटबल प्रतियोगिता अन्तर्गत सोमबारको खेलमा फर्साटिकर युथ क्लब, फर्साटिकर विजयी भएको छ । उमा आधारभुत विद्यालयको खेल मैदानमा भएको प्रतियोगितामा प्रतिस्प्रर्धात्मक खेलमा गोर्खा ब्वायज क्लब, बुटवललाई ट्राईबेकरमा ६–५ गोलले पराजित गर्दै फर्साटिकर दोस्रो चरणमा प्रवेश गरेको हो । निर्धारित समयको खेलमा गोर्खा ब्वायजका जमिर मियाले २३ औं मिनेटमा गोल गर्दै खाता खोलेका थिए । उनले फर्साटिकरका ३ जना डिफेन्सलाई छक्काएर आकर्षक गोल गर्न सफल भएका थिए । दुई जना विदेशी खेलाडीसहित मैदानमा उत्रेको फर्साटिकरका तर्फबाट गोल खाएको एक मिनेटमा नै सुरज हमालले गोल फर्काएका थिए । तर रेफ्रीले त्यो अफसाईज घोषणा गरे । खेलको ४० औं मिनेटमा सुरज हमालको क्रसलाई विष्णु गुरुङ्गले गोल गर्दै खेल बराबरीमा ल्याएका थिए । एन्फा एकेडेमीका अनुभवी खेलाडीको साथ रहेको गोर्खा ब्वायजका तर्फबाट धेरै गोलका प्रयासहरू विफल भएका थिए । निर्धारित समयमा १–१ गोलको बराबरी भएपछि खेल ट्राईबेकरमा धकेलिएको थियो । फर्साटिकरमा जितमा अजय मार्टिन, सगुन पिटर, रोशन सेन, विष्णु गुरुङ्ग र राजु गिरीले गोल गरेका थिए सुरज रानाको प्रहार पोष्टमा लागेर फर्किएको थियो । यसैगरि गोर्खा ब्वायजका तर्फबाट ट्राईबेकरमा रबिन थापा, निशान्त न्यौपाने, निर्मल मिदुन र कमल गुरुङ्गले गोल गरेका थिए भने केशर दर्लामी र जमिर मियाको प्रहार बाहिरिएको थियो ।