खोज

स्वर्गद्वारी नगरपालिका–८ बर्जिवाङका स्थानीयलाई खानेपानीको जोहो गर्न दिउँसैदेखि लाइनमा बस्नुपर्ने बाध्यता छ ।  साँझको लागि दिउँसै लाइनमा बस्ने गरेको स्थानीयले बताए । एक गाग्री पानी भर्न आधा घण्टा बढी समय लाग्ने हुँदा पालो पर्खनुपर्ने स्थानीय केसी रोकाले बताइन् । उनी दिउँसोको चर्को घाममा छाता ओडेर पानी भर्दै थिइन् । खानेपानीकै चिन्ताले दैनिकजसो अन्य काममा असर परिरहेको उनको पीडा छ । ‘दिनहुँ यसैगरी लाइनमा बसेर पानी भर्नुपर्छ’, उनले भनिन्,‘धारामा सानो पानी आउँछ । पालो कुर्दाकुर्दै समय गइहाल्छ ।’ उनका अनुसार गाईभैंसीलाई समेत यही पानी खुवाउने गरिन्छ । विहान जसोतसो एक गाग्री पानी भरेपनि साँझको लागि दिउँसैदेखि लाइनमा बस्नुपर्ने बाध्यता उनले सुनाइन । ‘वर्षौदेखि गाउँमा खानेपानीको हाहाकार छ’,उनी भन्छिन्,‘गाउँमा पानी ल्याउन कसैले चासो देखाएका छैनन् ।’
पानीकै पिरलोले स्थानीयलाई दैनिक अन्य कामकाजका लागि समय मिलाउन समस्या भइरहेको छ । घरमा एकजना सदस्यको समय खानेपानीको लाइनमा बस्दै बित्ने गर्छ । गाउँकै डाँडागाउँको सानो मुहानबाट खानेपानी ल्याइएको छ । तर, यसले सिंगो गाउँलाई धान्न सकेको छैन् । ‘४० बढी घर खानेपानीको समस्याबाट पीडित छन्’,स्थानीय बयोवृद्ध सुरेश घर्तिले भने,‘लिफ्ट खानेपानी आयोजना ल्याउने भन्छन् । खै अहिलेसम्म आएको छैन ।’ छोराछोरीलाई पानी बोक्न लगाउँदा पढाइमा असर पर्ने गरेको अभिभावकहरूले गुनासो गरेका छन् ।
वर्षौदेखि गाउँमा खानेपानीको समस्या हुँदै आएको वडा अध्यक्ष खोप बहादुर रावतले जानकारी गराए । गाउँदेखि माथि कुंग्रिखोला, सातमुले खोलामा मुहान भएको उनले बताए ।
सातमुलेबाट आएको पानीले गाउँको आवश्यकता पुरा गर्न सकेको छैन् । ‘पानीको लाइनमा सानो पाइप भएकाले धारो सानो खसेको हो’,उनले भने,‘ठूलो पाइप भएमा पानीको समाधान हुनसक्छ ।’ करिव चार किलोमिटर दुरीसम्म ठूलो आकारको पाइप विच्छ्याउनुपर्ने उनको भनाई छ । खानेपानीको सहज आपूर्ति नहुँदा गाउँका रोकाटोल, मौधारा, थापाटोल, हुलाक कार्यालय नजिकका बस्ती धेरै समस्यामा छन् ।
वडा कार्यालयबाट तीन लाख रूपैयाँ विनियोजन गरेपनि दिगो समाधान हुन नसकेको उनले बताए । गाउँको अवस्था बुझेर खानेपानीको सहज पहुँच पु¥याउनेतर्फ ठोस योजना बनाउने नगरप्रमुख नेत्र बहादुर रोकायले बताए ।