खोज

बुटवल,२६ मंसिर । अदालतबाट जन्मकैदको सजाय पाएका रेशम चौधरीलाई छुटाउने गरी सरकारले ल्याएको अध्यादेशप्रति नेपाली कांग्रेसका महामन्त्रीद्वय गगन थापा र विश्वप्रकाश शर्माले आपत्ति जनाएका छन् । सरकार गठनमा वहुमत नपुगेपछि चौधरीलाई छुटाउने गरी सरकारले ल्याउन लागेको अध्यादेशको कांग्रेसका युवा नेताहरुले विरोध गरेपछि सत्ता गठबन्धनलाई धक्का लागेको छ । अध्यादेश ल्याउनेबारे पार्टीभित्र कुनै छलफल र कुनै निर्णय नभएको र विगतमा पार्टीको अडान जे थियो आज पनि त्यहि छ भन्दै महामन्त्री थापाले यो अध्यादेश कानूनी, राजनीतिक र नैतिक हिसाबले समेत गलत तथा असंवैधानिक र संसदीय व्यवस्थाको मर्म विपरीत रहेको स्पष्ट पारेका छन् ।

कांग्रेसका अर्का महामन्त्री विश्वप्रकाश शर्माको भनाइप्रति समर्थन जनाएर ट्वीट गर्दै थापाले यो शर्मा र आफ्नो मात्र नभई पार्टीकै धारणा भएको बताएका छन् । शर्माले अध्यादेशलाई गलत भन्दै अध्यादेश ल्याउनुमा कानुनी र राजनीतिक प्रश्न मात्र नभई यो प्रकरणमा नैतिक प्रश्नसमेत जोडिएको बताएका थिए ।

त्यसमा समर्थन जनाउँदै थापाले अदालतमा विचाराधीन मुद्दालाई सरकारले फिर्ता लिन नसक्ने बताएका छन् । थापाले यो राजनीतिक विषय हो भन्ने लागेर आवश्यकता देखे नयाँ संसदले कानून बनाएर प्रक्रिया अघि बढाउन सक्ने बताएका छन् ।