खोज

चन्द्रौटा (कपिलवस्तु) २२ चैत ।

प्रहरीमा निवेदन लेख्न खर्चिलो भएपछि कपिलवस्तु प्रहरीले नमुना निवेदनलाई क्यु आर कोडमा राखे पछि सेवाग्राहीलाई सजिलो भएको छ । जिल्लाका सबै प्रहरी युनिटमा क्युआर कोड राखे पछि कार्यालयमा निवेदन तथा उजुरी लेख्दा लाग्ने ५ सय देखी २ हजार जोगिएको छ ।

यस अगाडी निवेदन लेख्न लेखनदास वा वकिलको सहायता लिनु पथ्र्यो । अहिले कपिलवस्तुका हरेक प्रहरी युनिटमा यो समस्या सधैँको लागी अन्त्य भएको छ । कार्यालयमा समस्या लिएर आउने जो सुकैले पनि क्युआर कोड स्क्यान गरेर निवेदन दिन सक्ने भएका छन् ।

जिल्ला प्रहरी कार्यालय कपिलवस्तुले सेवाग्राहीलाई निवेदन लेख्नको लागी क्युआर र सहयोगी प्रहरीको व्यवस्था गरे पछि सेवाग्राही लाभान्वित बनेका छन् । कार्यालयमा उजुरी दिन गएका राज कुमार गुप्ताले एक व्यक्तिले निवेदन लेख्ने व्यक्ती नभेटेर अलमलमा परेका थिए ।

प्रहरी सहायक हवलदार कमल आर।सी।ले उनलाई हेर्दै भने “ निवेदनको नमुना क्युआर कोडमा छ । स्क्यान गर्न गरी त्यही अनुसार लेख्नु होस । नभए, म सहयोग गर्छु ।” गुप्ताले मोबाइल चलाउन नजान्ने बताएपछि प्रहरीले निवेदन लेखेको थियो । निवेदन लेख्न असहज मान्ने सेवाग्राहीलाई ध्यानमा राख्दै जिल्ला प्रहरी कार्यालय कपिलवस्तुले यो नयाँ पहल गरेको हो ।

प्रहरी कार्यालयभित्र विभिन्न निवेदनका ढाँचाहरू क्युआर कोडका माध्यमबाट उपलब्ध गराइएको छ । जसले प्रविधि जान्नेहरूलाई सजिलो बनाउँछ । तर, प्रविधि प्रयोग गर्न नजान्नेहरूका लागि भने कार्यालयले सहयोगीको व्यवस्था गरेको छ कार्यालय प्रमुख प्रहरी उपरीक्षक निरञ्जन दत्त भट्टले बताए ।

कार्यालयका प्रवक्ता तथा प्रहरी नायव उपरीक्षक मोहन मणी अधिकारीले यो व्यवस्था सेवा प्रवाहलाई छरितो बनाउने र सेवाग्राहीलाई अनावश्यक झन्झटबाट बचाउने बताउनु भयो । “कसैले निवेदन लेख्न सक्दैनन् भने हामी आफैँ सहयोग गर्छौँ । यसले नागरिकलाई झन्झट कम हुन्छ, अनि प्रहरी सेवाप्रति उनीहरूको विश्वास बढ्छ,” अधिकारीको भनाई रहेको थियो ।

मङ्सिर देखी सुरु भएको यो सेवामा १ सय बढीले सेवा लिएका छन् । जिल्ला ट्राफिक प्रहरी कार्यालय कपिलवस्तुले पनि विल बुक तथा लाइसेन्स हराएको निवेदनको नमुना क्युआर स्क्यान गरी पाउने प्रबन्ध मिलाएको कार्यालय प्रमुख प्रहरी निरीक्षक पङ्कज चुदालीले बताउनु भयो । कार्यालयको गेटमा क्युआर कोड टासिएकोले जनतालाई सहज बनाएको छ ।