खोज

रूपन्देहीको चर्चित घटना एमालेको भातृ संगठन तत्कालीन युवा संघ रूपन्देहीका अध्यक्ष दूर्गा तिवारीको हत्या र एमालेका अर्का नेता बलु पौडेलको हत्याका मुख्य योजनाकार मनोज पुनका विशेष सहयोगी भएको भन्दै पक्राउ परेका ६ जना मध्ये ३ जनालाई उच्च अदालत बुटवलले साधारण तारेखमा छाडेको छ । तत्कालीन घटनामा मुख्य योजनाकार मनोज पुनलाई नेपालका बिभिन्न ठाउँबाट सूचना दिएर हत्यामा सहयोगी बनेको भन्दै प्रहरीले बुटवलका सुजु मल्ल, उत्तम आचार्य, हरि श्रेष्ठ र देबदह नगरपालिकाका तुल्सी न्यौपाने, रोशन खड्का र तिलोत्तमा नगरपालिकाका लेखनाथ न्यौपानेलाई प्रहरीले पक्राउ गरी मुद्दा दायर गरेको थियो । जिल्ला अदालत रूपन्देहीले घटनामा आरोपित ६ जनालाई पुर्पक्षका लागि थुनामा राख्ने आदेश गरेको थियो ।
जिल्ला अदालतको आदेशपश्चात आरोपित ६ जनाले उच्च अदालत तुल्सीपुर बुटवल इजलाशमा पुनरावेदनका लागि निवेदन दिएका थिए । बिहीबार उच्च अदालत तुल्सीपुर बुटवल इजलासमा भएको बहसमा मुख्य न्यायाधीश कुमार प्रसाद पोख्रेल र कृष्ण कमल अधिकारीको सयुंक्त इजलासले दूर्गा तिवारी र बलु पौडेलको हत्यामा आरोपित लेख नाथ न्यौपाने, तुल्सी न्यौपाने र हरि श्रेष्ठलाई तत्कालको प्रमाणबाट संलग्न नदेखिएको भन्दै साधारण तारेखमा छाडेको छ भने उनीहरुसँगै पक्राउ परेका सुजु मल्ल, उत्तम आचार्य, रोशन खड्कालाई जिल्ला अदालत रुपन्देहीको आदेश सदर गर्दैै पुर्पक्षको लागि थुनामा राख्ने आदेश भएको उच्च अदालत बुटवलका रजिष्टार ठगिन्द्र कट्टेलले बताए । उच्च अदालत बुटवलमा भएको बहसमा प्रतिबादीको तर्फबाट ६ जना वकिलले बहस गरेका थिए । तिवारी र पौडेल हत्याका मुख्य योजनाकार मनोज पुन र सोम आलेको भने प्रहरी ईन्काउन्टरमा मृत्यु भएको थियो । 

प्रहरी ईन्काउन्टर गरिएको स्थान । फाईल तस्वीर