खोज

नेपालगञ्ज नगरपालिकाको वडा नं. १३ चौलिका चोकमा मानिसहरू जुट्नुको उद्देश्य फरक छ । जहाँ मानिसहरू भेटघाटका लागि मात्रै जुट्दैनन् । जुट्नुको मुख्य उद्देश्य हुन्छ हलुवा पराठा (परौठा/रोटी) खाई भोक मेटाउने । खाजाका लागि रिक्सा चालक, टाँगा चालक मात्र होइन मोटरसाइकल र कार चढ्ने पनि आउँछन् । नेपालगञ्ज पुग्नेहरू समेत उनको खाजा पसलमा पराठा र हलुवाको स्वाद लिन पुग्ने गर्दछन् ।
चोकको पश्चिमतर्फ रहेको खरको छानोमुनि पाकिरहेको हुन्छ सुपो जत्तिकै ठूलो देखिने पराठा । जुन पराठा रोटी खानुको स्वाद त छँदैछ बनाएको हेर्न झनै मज्जा आउँछ ।
सुपो भन्दा ठूलो तावामा पकाउनु अघि पराठा पकाउने कारिगढले पिठोलाई केही पराठाको आकारमा बनाएपछि त्यो आकारबाट बढाएर सुपो जत्तिकै ठूलो आकारमा पु¥याउँछन् । जुन पराठाको आकारले आधा शरीर छोपिन्छ । छेउतिरबाट हेर्दा पकाउनु अघिको काचो पराठा पछ्यौरा ओढे जस्तै देखिन्छ ।
यसरी पराठा र हलुवाको खाजा घर चलाएको ३२ बर्ष पुगिसकेको पराठा पकाउँदै गरेका मोहर अली बताउँछन् । एउटै पराठाबाट कम्तीमा १० जनासम्मलाई पुग्ने उनको भनाइ छ । पिठोमा नून र घिउ राखी बनाइएको उक्त पराठा चक्कुले काटेर हलुवा बीचमा राखि खाने गरिन्छ । दिनमा ३० देखि ४० वटासम्मको पराठा बिक्री हुने जलील अहमद शेष बताउँछन् । हलुवा र पराठा खाँदै गर्दा भेटिएका नेपालगञ्ज नगरपालिका वडा नं. २१ मा बसोवास गर्ने नीजाम बेहेनाले भोक लाग्दा २५ रुपियाँको खाजा खान यहाँ आउने गरेको बताए । मजदूरीको काम गर्छु भोक लागे यहि हलुवा र पराठा खान्छु बेहेनाले बुटवल टुडेसँग भने ।