भैरहवा, १० माघ ।
७३ औं अन्तर्राष्ट्रिय भन्सार दिवस–२०८१ को अवसरमा मदरसाका विद्यार्थीहरुलाई स्वीटर वितरण गरिएको छ । भैरहवा भन्सार कार्यालय बेलहिया, रुपन्देही र नेपाल भन्सार एजेण्ट संघ सिद्धार्थनगर, रुपन्देहीले बिहीबार एक कार्यक्रमकाबीच स्वीटर वितरण गरेका हुन् । सामाजिक उत्तरदायित्व अन्तर्गत रुपन्देहीको रोहिणी गाउँपालिका–१ बेनीपुरस्थित मदरसा ईस्लामिया का.अ.सु. फैजुल ओ.मा अध्ययनरत १८२ जना विद्यार्थीहरुलाई स्वीटर वितरण गरिएको नेपाल भन्सार एजेण्ट संघ सिद्धार्थनगरका अध्यक्ष मधु प्रसाद पन्थीले बताए ।
कार्यक्रममा सिद्धार्थनगर नगरपालिकाका प्रमुख (मेयर) इश्तियाक अहमद खाँले मनबाटै सहयोग गर्ने भावना जागृत भइ आयोजना गरिने यस्ता कार्यक्रम महत्वपूर्ण रहेको बताए । ‘समयसमयमा विद्यालयहरुलाई सहयोग गर्नुपर्छ, नगरप्रमुख खाँले भने–‘यसले विपन्न तथा जेहेन्दार विद्यार्थीहरुलाई केही न केही भए पनि सहयोग पुग्छ ।’
त्यस्तै भैरहवा भन्सार कार्यालयका प्रमुख भन्सार अधिकृत राम प्रसाद रेग्मीले सामाजिक उत्तरदायित्व बहन गर्दै कार्यालय नजिकै सीमा क्षेत्रमा रहेको विद्यार्थीहरुलाई स्वीटर वितरण गरिएको बताए । उनले विद्यालयको आवश्यकतालाई मध्यनजर गर्दै विद्यार्थीहरुलाई केही भए पनि सहयोग पुगोस् भन्ने उद्देश्यले नेपाल भन्सार एजेण्ट संघ सिद्धार्थनगरको सहकार्यमा कार्यक्रम गरिएको बताए ।
रोहिणी गाउँपालिका वडा नम्बर १ का वडाअध्यक्ष आविद अली पठानले आफू विगत ८ वर्षदेखि मदरसा व्यवस्थापन समितिको अध्यक्ष समेत रहेको र यो मदरसामा पहिलोपटक भन्सार कार्यालयबाट सहयोग प्राप्त भएको बताए । ‘यस्तो कार्यक्रम यो मदरसामा पहिलोपटक भन्सार कार्यालयले गरेको छ, खुसी लागेको छ’उनले भने–‘यस्ता कार्यक्रमलाई आगामी दिनमा निरन्तरता दिन आग्रह गर्दछु ।’
१६ माघ २०८१, बुधबार
