© २०२३
देवदह,२२ कात्तिक । राष्ट्रिय जनमुक्ति पार्टीले महंगो निर्वाचन प्रणालीका कारण हुने भ्रष्टाचार र संसदीय राजनीतिको विकृति रोक्न पूर्ण समानुपातिक निर्वाचन प्रणाली अवलम्बन गर्नुपर्नेमा जोड दिएको छ । प्रत्यक्ष र मिश्रित निर्वाचन प्रणालीमा धनाढ्यहरु मात्रै करोडौं खर्च गरेर चुनाव लड्न सक्ने र चुनाव जितेपछि भ्रष्टाचार हुने परिपाटी रोक्न पुर्ण समानुपातिक प्रणालीमा जानुपर्ने पार्टीका केन्द्रिय अनुगमन विभाग संयोजक दलबहादुर बिरकट्टाले बताए । पार्टीका समानुपातिक उम्मेदवार समेत रहेका बिरकट्टाले मंगलबार देवदहमा पत्रकारसंगको अन्तरक्रियामा बोल्दै दलका नेताहरूमा निर्वाचन जित्न अनेक प्रतिबद्धता सार्वजनिक गर्ने तर जितेपछि कार्यान्वयनमा ध्यान नदिने प्रवृत्ति बढ्दै गएको हुंदा राइट टु कलको वयवस्था हुनुपर्ने पनि बताए ।
भ्रष्टाचार देशको मुख्य समस्या रहेको र त्यसलाई नियन्त्रण गर्न भ्रष्टाचारीलाई राजद्रोह सरह मुद्दा चलाउने र भ्रष्टाचारीलाई आजिवन कारावासको सजाय सहित सर्वस्वहरण गरिनुपर्ने जनमुक्ति पार्टीले जनाएको छ । सबै तहको शिक्षा र स्वास्थ्य सेवा निशुल्क गर्नुपर्ने विचार अघि सारेको जनमुक्तिले कृषि, पर्यटन र विद्युतलाई आर्थिक आर्जनको मुख्य क्षेत्र बनाउनुपर्ने जनाएको छ ।
त्यसैगरी काठमाडौंको ऎतिहासिकतालाई जोगाउन देशको बैकल्पिक राजधानी र र धेरै संघीय मन्त्रालयहरू काठमाडौं उपत्यका बाहिर राख्नुपर्ने जनाएको छ ।
साथै जनप्रतिनिधिहरूले तलब सुविधा नलिने व्यवस्था गरिनुपर्ने धारणा समेत उक्त पार्टीले अघि सारेको छ ।