खोज

लमही, १४ मंसिर ।
दाङको राप्ती गाउँपालिकामा बालबालिकाको कुपोषणको अवस्था पत्ता लगाउन ३ हजार ३ सय ८७ बालबालिकाको पाखुराको नाप लिने अभियान शुरु गरिएको छ । कुपोषणका कारण बालबालिकाको स्वास्थ्यमा परिरहेको गम्भीर प्रभावलाई मध्यनजर गर्दै गाउँपालिकाको नौ वटै वडाका ६ देखि ५९ महिना सम्मका बालबालिकाको पोषण अवस्था जाँच गर्न लागिएको हो । हेलन केयर, भिटामिन एन्जेल र आईडिईको सहयोगमा बेस संस्था द्वारा सञ्चालित ‘पोषण मार्फत जीवन रूपान्तरण परियोजना’ अन्तर्गत यो कार्यक्रम सञ्चालन गरिएको हो ।
बालबालिकाको पाखुराको बिच भागको परिधी मापन गरेर कुपोषणको अवस्था वर्गीकरण गरिन्छ ।
यसरी नाप लिँदा ५.५ सेन्टिमिटरदेखि ११.५ सेन्टिमिटरः कडा कुपोषण (रातो चिन्ह), ११.५ सेन्टिमिटरदेखि १२.५ सेन्टिमिटरः मध्यम कुपोषण (पहेलो चिन्ह) र १२.५ सेन्टिमिटरभन्दा माथिः सामान्य अवस्था मानिन्छ ।
गाउँपालिकाका ९ वटै वडाका ६४ जना महिला स्वास्थ्य स्वयंसेविकामार्फत बालबालिकाको पाखुराको नाप लिइने योजना रहेको छ । परियोजनाको पहिलो चरणमा घरदैलोमार्फत सचेतना फैलाउँदै सबै बालबालिकाको मल्टीसेक्टरल एक्योन् फर न्यूट्रिसन (मुआक) लिने कार्य गरिने छ ।
मुआक परीक्षणपछि बालबालिकाको पोषण सुधार गर्न योजना निर्माणमा सहयोग पुग्ने हेलन केयरका फिल्ड संयोजक अनिल केसीले बताए । दाङको राप्ती गाउँपालिकामा बालबालिकाको पोषण सुधार गर्न थालिएको यो अभियानले समुदाय–आधारित स्वास्थ्य प्रवद्र्धनमा सकारात्मक योगदान दिने सम्भावना छ । यो पहलले विभिन्न पक्षलाई समेटेको छ, जस्तै हेलन केयर, भिटामिन एन्जेल, आईडिई, र स्थानीय स्वास्थ्य स्वयंसेविकाहरू पाँच वर्षे अवधिमा पालिकाका सबै वडामा लक्षित उमेर समूहका बालबालिकाको पोषण सुधारका लागि कार्य गरिने संयोजक केसीले जानकारी दिए । संस्थाका जिल्ला सचिव रूपलाल चौधरीले महिला स्वास्थ्य स्वयंसेविका, स्वास्थ्य प्रदायक संस्था, वडास्तरीय स्वास्थ्य संरचना र सरोकारवालाबीच समन्वय गरेर पोषण सुधारका प्रयासलाई अघि बढाइने बताए । राप्ती गाउँपालिकाकी उपाध्यक्ष कमलापती चौधरीले बालविवाह न्यूनीकरण र पोषणयुक्त खानाबारे सचेतना अभिवृद्धि गर्न पालिकाले जोड दिँदै आएको बताइन् ।
त्यस्तै गाउँपालिकाका प्रवक्ता तथा वडा नम्बर २ का अध्यक्ष प्रवक्ता पहलवान चौधरीले बालबालिकाहरू कुपोषणमुक्त भए मात्रै उनीहरूको शारीरिक, मानसिक तथा शैक्षिक अवस्था राम्रो हुने बताउँदै यो अभियानलाई सशक्त बनाउनु पर्नेमा लैजाने बताए । राप्ती गाउँपालिकामा हाल ०.३५ प्रतिशत बालबालिका कुपोषित रहेको तथ्यांकले देखाएको छ ।