खोज

धम्बोझी—१, नेपालगन्ज उपमहानगरपालिकाका महेश कादु यूरिया मलका लागि कृषि सामग्री केन्द्र नेपालगन्जमा धाउन थालेको पाँच दिन भयो । कर्मचारी प्रवेश गरेसँगै कादु पनि उनीहरूसंगै कृषि सामग्री केन्द्रको परिसरमा पुग्छन्, कर्मचारीसँग यूरिया मल आए नआएको सोध्छन् । ‘पाँच दिन भयो अहिलेसम्म मल पाएको छैन ।’ कादुले भने,—‘संधै रित्तो हात घर फर्किन्छु ।’
धानलाई मल चाहिने बेला यूरिया मल नपाएर बाँकेका कृषक यतिबेला हैरान छन् । मल बितरण गर्ने कृषि सामग्री केन्द्रले उपलब्ध गराउन सकेको छैन । हरेक दिन आउने कृषकलाई रित्तो हात फर्काउँछन् कर्मचारी । ‘माग अनुसार मल नै छैन । कृषकलाई रित्तो हात फर्काउनुको विकल्प नै छैन,’ केन्द्रका कर्मचारीको भनाइ छ ।
अनुदानको मलका लागि कृषकहरू कृषि सामग्री केन्द्रको मलको प्रतिक्षा गर्छन । भारतीय बाटोबाट हुने तस्करीको मलको बिकल्प रोज्नुपर्छ । तर भारतीय सुरक्षाकर्मीले त्यसमा समेत कडाई गरेपछि अहिले त्यस्तो मल पनि नेपाल भित्रिन पाएको छैन । कृषकहरू यतिबेला खेतीमा लाग्नुको साटो दिनहुँजसो मलका लागि भौतारिनु परेको कृषक कादुले बताए । कृषि सामग्री कम्पनी लिमिटेड नेपालगन्जले किसानको माग अनुसार मल कम आएकोले समस्या भएको निमित्त प्रबन्ध निर्देशक रमेश कुमार पौडेलले बताए ।
२०७४÷०७५ मा कृषि सामग्री कम्पनी लिमिटेड नेपालगन्जमा ३ हजार मेट्रिक टन युरियाको लक्ष्य थियो । तर माग बढेर बिक्री ४ हजार ३ सय मेट्रिक टन रह्यो । पौडेलले शनिबारसम्म नेपालगन्जमा ५ हजार बोरा मल आउने र आइतवार किसानहरूले पाउने बताए ।