खोज

नवलपुर ।

उद्योगले स्थानीय बस्तीमा प्रदुषण फैलाएको भन्दै स्थानीयले धर्ना दिएका छन । देवचुली नगरपालिका वडा नं २ मा रहेको चौधरी उद्योगले बस्तीमा धेरै मात्रामा कालो खरानी छोडेको भन्दै स्थानियहरु उद्योगबाट निस्किएको कालो खरानी नियन्त्रण गर्न भन्दै उद्योग प्रशासनलाई दवाव दिएका छन ।

देवचुली नगरपालिका वडा नं २ का वडा अध्यक्ष शरदप्रसाद घिमिरेको संयोजकत्वमा धर्ना दिएका थिए । अध्यक्ष घिमिरेले उद्योगलाई पटकपटक आग्रह गर्दा पनि उद्योगको बोइलर प्लान्टबाट निस्कने भुषे कालो खरानीले पुरै बस्तीलाई नै असर पुर्याएको र यसको नियन्त्रण गर्न माग गर्दे उद्योग अगाढि धर्ना कार्यक्रम गरेको बताए । यस्तै स्थानीयहरुले उद्योगले जनतालाई नटेरेको कारण लापरवाही गरेको र यसको प्रतिशोधमा जनता धर्नामा बसेको देवचुली उद्योग बाणिज्य संघका महासचिव तथा स्थानीय विनोद सिलवालले बताए ।

उद्योगले स्थानीयलाई रोजगार प्रदान गरेको भए पनि उद्योगले आफ्नो क्षमता र जनताको स्वास्थ्यसंग खेलवाड नगरी उद्योगले सहि ठंगले काम गर्नुपर्ने स्थानीय भेषराज न्यौपानेको भनाइ छ । यता उद्योग प्रशासनले उद्योगले आफ्नो मेशीनरी औजार मर्मत गरी रहेको र सो समयमा खरानी उडेको बताएका छन ।

उद्योग महाप्रबन्धक रहेका रामकाजी सिटौलाले जनताको स्वास्थ्यसंग उद्योगले कहिलै पनि खेलवाड नगरेको तर मेशिनरी र प्राविधिक विषय भएकोले यसको मर्मतमा लागेको जानकारी दिएका छन । उद्योग र स्थानीयविचको द्धन्द लामो समय सम्म रहेको र अब यो द्धन्द वारपार गरि छाड्ने स्थानीयहरुको अडान छ । उनीहरुले सोमवार उद्योग प्रशासनलाई छिटो मर्मत गर्न ज्ञापन पत्र दिने र त्यस पछि कडारुपमा अघि बढ्ने बताए ।