खोज

प्यूठान, १० कात्तिक ।

नेपाल कम्युनिष्ट पार्टीका महासचिव नेत्र विक्रम चन्द (विप्लव) ले नेपालका संविधानको पक्षमा रहेका दलले समाजवादको खाका तयार गर्नु पर्ने बताएका छन् । नेपालको संविधान २०७२ ले समाजवाद उन्मुख अर्थतन्त्र भनेपनि सिमान्तकृत समुदायको पक्षमा व्यवस्थाले नछोएको बताउँदै सबै पक्षलाई समेट्न समाजवादको खाका तयार गरी सविधान संशोधन गर्नु पर्नेमा जोड दिए ।

शुक्रबार जुम्रीमा आयोजित संयुक्त राजनीतिक दलित संघर्ष समिति प्यूठानद्वारा आयोजित सि जाती अर्थात समान जाति विषयक अन्तत्र्रिmया कार्यक्रममा बोल्दै विप्लवले दलित, महिला, श्रमिक वर्गको व्यवस्था र संविधानले गर्न नसकेको जिकिर गरे । ‘सामन्तवादी राजतन्त्र मात्रै फेरिएर गणतन्त्रको स्थापना भयो तर पूजीवाँदी अर्थतन्त्रले जनतालाई तल पारेर नेता तथा धनाढ्यहरुलाई हालीमुहाली गर्ने वातावरण तयार भयो’ विप्लवले भने,‘त्यसैको अन्त्यका लागि संविधानका पक्षधरहरुले समाजवादी अर्थतन्त्रको खाका तयार गरी व्यवस्थाका नकारात्मक पाटाहरुलाई सुधार गर्नुपर्छ ।’

व्यवस्थालाई नसुधारे जनताले भ्रष्टाचार, जातीय विभेद, श्रमिक वर्गको शोषणको विरुद्ध लडिरहने, राज्यले केही सम्बोधन गरी दोहन गरिरहने प्रवृत्तिको अन्त्य नहुने उनको भनाइ थियो ।

अन्तक्र्रिया कार्यक्रममा सहभागीहरुले सी जातीबारे जिज्ञासा राखेका थिए । विप्लवले जाति समानताका लागि सबै व्यक्तिहरुलाई समान जाति अर्थात सि जाति समुदायको विकास गरी सोही अनुसारको समाज विकासको खाका तयार गरी सी जातीको अवधारणा ल्याइएको समेत बताए । यसले जाति अनुसारका विभेदको अन्त्य गर्दै वैज्ञानिक सि समुदायको निर्माण हुने, सि समुदायको आफ्नै अर्थव्यवस्था निर्माण गरी वर्गीय उत्थान हुने अवधारणाको विकास गरेको उनको दावी छ । उनले सरकारसंग सि जातिको नागरिकता प्रदानका लागि कानुन संशोधनको माग गरिएको बताए ।

जिल्लास्थित सम्पूर्ण राजनीतिक दलका प्रतिनिधि, दलका दलित सम्बन्धी जनवर्गीय संगठनका प्रतिनिधिहरु रहेको कार्यक्रममा समान जातीका लागि सबै बक्ताहरुले ऐक्यवद्धता जनाएका छन् ।