खोज

नेपालगन्जमा पप्पु निर्माण सेवाले निर्माण गरेको चारलेन सडक हस्तान्तरण नहुँदै खाल्डैखाल्डोमा परिणत भएका छन् । जमुनाहदेखि राँझाचोकसम्म पिच उध्रिएर साठठ्ीवटा साना ठूला खाल्डा बनेका छन् । सडक खाल्डोमा परिणत भएपछि दैनिकजसो सवारी दुर्घटना भइरहेका छन् । सवारीसाधन चलाउनै मुस्किल भएको छ ।पप्पु जेभीले ५७ करोड रूपैयाँमा राँझा–जमुनाहा सडकखण्ड कालोपत्रे गर्ने ठेक्का लिएको थियो । एक वर्ष अघि नै काम सकिएको भन्दै पप्पुले अहिले सडक निर्माणको काम रोकेको छ ।  नत काम सुरु भएको नत हस्तान्तरण नै । सडक हस्तान्तरण नहुँदै सडक खाल्डाखुल्डीमय बनेपछि आवतजावतमा समस्या भएको छ । दैनिक सडकमा सवारीसाधन फस्ने गरेका छन् । ठेकेदारले गुणस्तरहिन काम गरेर हस्तान्तरण नगरेपछि नेपालगन्ज उपमहानगरपालिकाले खाल्डा पुर्ने काम सुरु गरेको छ । सवारी दुर्घटनाको जोखिम देखिपछि बुधवारदेखि साठ्ीवटा खाल्डा पुर्न सुरु गरिएको नेपालगन्ज उपमहानगरपालिकाका कार्यवहाक मेयर प्रमोद रिजालले जानकारी दिएका छन् । ‘ठेकेदार कम्पनीले चासौ दिएनन् । सडकभरी खाल्डा हुँदा सवारी दुर्घटना बढेपछि हामीले खाल्डो पुर्ने काम सुरु गरेका हौं ।’—रिजालले भने । उनले खर्च भएको ईस्टिमेट गरे ठेकेदार कम्पनीलाई नै त्यसको खर्च भराउने सकिने पनि बताए ।
गुणस्तरहीन सडक बनाएको भन्दै पप्पु निर्माण सेवा यसअघि जरिवाना असुली गरिसकिएको छ । नेपालगन्जको जमुनाहा–राँझा सडक खण्ड निर्माणको जिम्मा पाएको पप्पु कन्स्ट्रक्सन जेभीले समयमा काम पूरा नगर्नुका साथै न्यून गुणस्तरको काम गरेकाले एसियाली विकास बैंक (एडीबी) ले सो निर्माण कम्पनीबाट ५ करोड ५० लाख रूपैयाँ जरिवाना असुल गरेको हो । सो सडकको काम पूरा गर्ने समय गत वर्ष जुलाई महिनामै सकिए पनि अझै उक्त सडक निर्माण पूरा हुनसकेको छैन । न्यूनगुणस्तरको सडक निर्माण गरिएकाले ठाउँ–ठाउँका सडकमा खाल्डा–खुल्डी परेका छन् भने अधिकांशस्थानको कालोपत्रेसमेत उप्किंदै गएको छ । सो सडक निर्माणको ढिलासुस्ती र गुणस्तरियताको विषयलाई लिएर गतवर्ष नेपालगन्जवासीले आन्दोलनसमेत गरेका थिए । तर, पनि सो सडकमा कुनै सुधार गरिएन । निर्माण कम्पनीले औपचारिक रूपमा अझै सो सडकलाई सडक डिभिजन कार्यालयलाई हस्तान्तरण नगरेका कारण खाल्डा–खुल्डी भएको र टुटफुट भएको स्थानमा मर्मत सम्भार गर्न समस्या भएको सडक डिभिजन कार्यालयले जनाएको छ । जनताको माग र आवश्यकतालाई ध्यानमा राखेर अन्य बजेटबाटै सो सडकको सामान्य मर्मत सम्भार भने गराउँदै आएको सो कार्यालयको भनाइ छ । सडक निर्माणको समय गतवर्ष नै सकिए पनि अझै धेरै ठाउँमा रेलिंग लगाइएको छैन भने कतिपय स्थानमा डिभाइडरसमेत राखिएको छैन । विभिन्न स्थानका नाला पनि अधुरा छन् ।