खोज

नवलपुर, १२ असोज ।

पुर्वी नवलपरासीमा लगातरको मुसलधारे वर्षाका कारण शनिबार बिहान नारायणी नदीको बाढी इतिहासकै उच्च विन्दुमा पुगेको छ ।

जलमापन केन्द्र देवघाटमा बिहान नदीको पानीको सतह ११ मिटर ३५ सेन्टिमिटर पुगेको छ । जलमापन केन्द्र स्थापनाकाल देखि हालसम्म नदीको सतह यति माथि पुगेको पहिलो हो । यस अघि असार असार २२ गते १० मिटर ४६ सेन्टिमिटर पुगेको थियो । नदीमा यति धेरै पानी बगेको यसअघि भएपनि यस क्षेत्रमा बस्ने अधिकाँशलाई यो बारेमा थाहा छैन् । नारायणगढ बजारका पुराना बासिन्दा नारायण गौडेलले भने, “२०१८ सालमा यस्तै प्रकृतिको बाढी आएको बताउँछन् । ठ्याक्कै भन्न त कसरी सकिन्छ र तर, मलाई लाग्छ २०१८ सालको बाढी यो भन्दा कम थिएन ।”

नारायणी नदीमा नौ मिटर पानीको सतह पार गर्नुलाई खतरा मानिन्छ । मापन अनुसार सात मिटर ३० सेन्टिमिटर सतह पार गर्नुलाई नदीको बहाव मापदण्ड भन्दा माथि रहेको सतर्कताको अवस्था मानिन्छ भने नौ मिटर पार गर्नु खतराको सूचकको रुपमा लिने गरिन्छ ।
पुर्वी नवलपरासीका प्रमुख जिल्ला अधिकारी अरुण पोख्रेलले जलमापन केन्द्रले दिएको उक्त जानकारीलाई आधार मान्दै नदी किनारका बस्तीका बासिन्दाहरुलाई सचेत रहन आग्रह गरिएको र जिल्ला स्थित विपद व्यवस्थापन टीम तयारी अवस्थामा राखिएको जानकारी दिए । लगातार परेको पानीले नवलपुरको अधिकाँश क्षेत्र जलमग्न बनेको छ ।