खोज

प्युठान, १२ असोज ।

प्युठानमा पानी चुहिएर २ घर भत्किएका छन् । गौमुखी गाउँपालिकामा एक र स्वर्गद्वारी नगरपालिकामा एक गरी दुई घर भत्किएको प्रहरी कार्यालयले जनाएको छ ।
बिहिबारदेखि निरन्तर आएको वर्षाका कारण घर चुहिएर भत्किएको जिल्ला प्रहरी कार्यालय प्युठानका सूचना अधिकारी प्रहरी निरीक्षक केशव के.सी.ले जानकारी दिए । उनका अनुसार गौमुखी गाउँपालिका–३ कोरबाङका विष्णु सेन र स्वर्गद्वारी नगरपालिका–३ धापधाराका तेज बहादुर नेपालीको कच्ची घरमा पानी चुहिएर भत्किएको हो । पीडितहरुलाई उद्धार गरी आफन्तको घरमा राखिएको छ ।

इलाका प्रहरी कार्यालय भिंग्रीको प्रहरी ड्यूटी बस्ने पोष्ट, पर्खाल र भरिएका हतियारहरु खाली गर्ने ठाउँ समेत भत्किएको छ ।

बर्षाका कारण पहिरो जाने, लेदो झर्ने हुँदा प्युठानको मुख्य सडक भालुबाङ–प्युठान सडक बाहेकका सडकहरु अवरुद्ध भएका छन् । लामो प्रयास पछि भालुबाङ–प्युठान सडक खण्डमा पर्ने गर्जेनी, सिमलचौर, खहरे लगायतका ठाउँबाट अवरोध खोलिएको हो । प्युठान–तिराम–घोराही सहित जिल्लाका बजारलाई जोड्ने सबै सडकहरु अवरुद्ध भएको सूचना अधिकारी के.सी.को भनाइ छ ।

जिल्ला भर नरोकिएकोले क्षति विवरण आउन सकेको छैन् । हाल उपलब्ध जानकारी अनुसार प्युठान नगरपालिका–१ खैरा स्थित झिमरुक मत्स्यपालन तथा एकिकृत कृषि फर्ममा बाढी पसी माछा बगाउँदा ५ लाँखको क्षती भएको छ ।

फर्ममा बढी पानी परेपछि ५ वटा पोखरीमा रहेको सबै माछा बगाएको फर्मका सञ्चालक भोज बहादुर बस्नेतले जानकारी दिए । सञ्चालक बस्नेतका अनुसार ५ वटा पोखरीमा रहेको सबै माछा बगाउँदा करिब ५ लाख बराबरको क्षति पु¥याएको हो । ५६ रोपनी क्षेत्रफलमा १० वटा पोखरी मध्ये ५ वटा पोखरी भत्काइदिएको छ । फर्ममा क्षति पु¥याइ दिएको भन्दै बस्नेतले नगरपालिकाको विपद व्यवस्थापनले समन्वय गरिदिन आग्रह गरेका छन् ।

सडक अवरुद्ध र वर्षा चलिरहेका कारण जिल्लामा क्षति विवरण आउन सकेको छैन । वर्षा रोकिएपछि वर्षाले गरेको क्षति गरेको विवरण आउने सूचना अधिकारीको भनाइ छ ।