खोज

बुटवल,१० कात्तिक । सत्ता गठबन्धनमा आवद्ध दलहरुले राष्ट्रिय जनमुक्ति पार्टीलाई विगतमा जातीय क्षेत्रीय राजनीति गरेको आरोप लगाउंथे । हुन पनि जनमुक्ति र गठबन्धनमा रहेका दलहरुबीच राजनैतिक, वैचारिक विषयमा धेरै असमानता छन् । तर रुपन्देही–२ मा सत्ता गठबन्धन उम्मेदवारविहीन भएपछि वाध्य भएर जनमुक्ति पार्टीका उम्मेदवार केशवबहादुर थापालाई समर्थन गर्न पुगेका छन् ।
गठबन्धनबाट एकीकृत समाजवादीका उम्मेदवार राजु गुरुङको उम्मेदवारी खारेजी भएपछि गठबन्धन बिखलबन्दमा परेको थियो । यो क्षेत्रमा नेकपा एमालेबाट पार्टी उपाध्यक्ष एवं पुर्व अर्थमन्त्री विष्णु पौडेल उम्मेदवार छन् । अब यहां २०६४, २०७० र २०७४ को चुनाव लगातार जितेका पौडेलसंग गठबन्धनको समर्थन पाएका थापाको प्रतिस्पर्धा हुने छ ।
गठबन्धनले जनमुक्तिका उम्मेदवारलाई समर्थन गरेलगत्तै कांग्रेस निकट मतदाताहरुले असन्तुष्टी व्यक्त गर्न थालेका छन् ।
सामाजिक सञ्जालमा कांग्रेस निकट एकजनाले लेखेका छन्–‘भोट भन्ने चिज रिस र आवेगमा आएर दिने होइन,न कुनै नेताहरूको उर्दिबाट दिने हो । भोट दिनु र छोरी दिनु उस्तै हो । छोरी दिंदा गलत ब्यक्तिलाई दिए छोरीले दुख पाउंछन् । भोट दिंदा गलत ब्यक्तिलाई दिए देशको मात्र होइन यस क्षेत्रको बिकास पनि खत्तम हुन्छ। यस क्षेत्रको बिकासको लागि सांसद भएर मात्र केही हुनेवाला छैन । सांसद मात्र भए तलब भत्ता हसुर्ला तर हामी र हाम्रो क्षेत्र धेरै पछाडि जानेछ । तेसैले हाम्रो एक भोटले मन्त्री मात्र होइन, प्रधानमन्त्री बन्न सक्ने तागत भएको रोजौं । हिजोका तिता मीठा सबै भुलेर अगाडि बढ्नु पर्छ। यस क्षेत्रका ब्यक्ति प्रधानमन्त्री बन्न सक्ने खुबी भएको हुदा हुदै कहा संसद मात्र हुनेलाई भोट दिने रु म त मर्न परे नि दिन्न । पार्टी जुनसुकै होस् मलाई केही फरक पर्दैन ।’
यो भनाईको सार फरक पार्टी भएपनि भविष्यमा प्रधानमन्त्री हुने संभावना बोकेका एमाले उम्मेदवार विष्णु पौडेललाई भोट दिन्छु भन्ने हो ।

कांग्रेसकै एक युवा नेता नाम उल्लेख नगर्ने शर्तमा रुपन्देही २ मा जनमुक्तिलाई समर्थन गर्नुको उद्देश्य त्यो पार्टीका उम्मेदवारलाई जिताउन नभई रुपन्देही ३ मा जनमुक्तिको भोट आफूलाई तान्न  गृहमन्त्री बालकृष्ण खांणले गरेको चलाखी मात्रै भएको बताउंछन् ।

कांग्रेसकै अर्का युवा कार्यकर्ता लक्ष्मण गौतम लेख्छन्– ‘अस्ती अस्ती रुख भन्दै हिंडियो,अनि कलम भन भने,अब घर भन भन्दैछन् । मंसिर–४ मा कता ठोक्ने हो कुन्नी ? बिजोग छ । राजनीति कि लाजनीति ?? ’
यी त केही उदाहरण प्रतिनिधि पात्र मात्र हुन् । शीर्ष नेताको कोपभाजनमा परिन्छ भनेर कांग्रेसका धेरै नेता कार्यकर्ताहरु रुपन्देही २ अरु दललाई सुम्पेकोमा सन्तुष्ट छैनन् ।
रुपन्देही ३ मा जनमुक्तिको २–३ हजार भोट भएकाले त्यो भोट आफ्नो पोल्टामा पार्न गृहमन्त्री बालकृष्ण खांणले रुपन्देही–२ मा जनमुक्तिलाई समर्थन गर्ने भूमिका खेलेको राजनीतिक वृत्तमा चर्चा छ ।
२०७४ को चुनावमा एमाले र माओवादी गठबन्धन भएका बेला रुपन्देही २ मा राष्ट्रिय जनमुक्ति पार्टी तेस्रो शक्ति भएको थियो । उक्त चुनावमा राष्ट्रिय जनमुक्तिका रुकबहादुर पुनले ३६ सय मत पाएका थिए । पौडेलले कांग्रेसका उम्मेदवार युवराज गिरीलाई पराजित गरेका थिए । त्यतिखेर पौडेलले ४४ हजार ९ मत ल्याउँदा गिरीले २१ हजार ९४५ मत ल्याएका थिए ।
दुईपटक अर्थमन्त्री, जलस्रोत, रक्षासहित उपप्रधानमन्त्रीको जिम्मेवारी पूरा गरिसकेका पौडेलसँग प्रतिस्पर्धी बनेका थापाले रुपन्देही–२ का प्रदेश सभाका दुबै क्षेत्र तथा १, ३ र ५ नंं क्षेत्रको प्रतिनिधि सभा सदस्य उम्मेदवारलाई समर्थन गर्ने शर्तमा आफूलाई गठबन्धनले समर्थन गरेको थापाले बताए । रुपन्देही २ का प्रदेश सभामा सत्ता गठबन्धनबाट कांग्रेसका दीर्घबहादुर केसी र माओवादीका वामदेव क्षेत्री तथा एमालेबाट लिला गिरी र भोजप्रसाद श्रेष्ठ उम्मेदवार छन् ।
रुपन्देही २ का दुबै प्रदेश सभा र प्रतिनिधि सभाका १,३ र ५ नंं क्षेत्रका गठबन्धनका उम्मेदवारलाई जनमुक्तिले गठबन्धनलाई मत दिने शर्तमा आफूलाई समर्थन भएको थापाले बताए ।
यो क्षेत्रमा जनमुक्तिका थापासंगै केही साना पार्टी र स्वतन्त्र गरी १५ जना उम्मेदवार चुनावी मैदानमा छन् । जसमा नेपाल मजदुर किसान पार्टीका हरिसुन्दर बासी, नेपाल दलित पार्टीका राजु शाही, नेपाली कांग्रेस बीपीकी नमादेवी गौतम जैसी, मंगोल नेशनल अर्गनाइजेशनका दीपक थापा र राष्ट्रिय स्वतन्त्र पार्टीका गणेश पौडेल उम्मेदवार रहेका छन् । यस्तै रुपसिंह थापा, केशव बस्याल, टोपनारायण पौडेल, तारा घिमिरे, तुलसीराम यादव, सुरेन्द्र भारी, प्रदीप ज्ञवाली र विष्णु विक स्वतन्त्र उम्मेदवार छन् ।
थापालाई गठबन्धनको साथ भएपनि विचार सिद्धान्तमा धेरै असमानता र गठबन्धन दलहरु भित्रैको असन्तुष्टी र जनमुक्तिको प्रतिस्पर्धी जस्तै मानिने मंगोल नेशनल अर्गनाइजेसनका दीपक थापा, रुपसिंह थापामगर पनि जनजाति उम्मेदवार भएकाले उनीहरुको मत बांडिने देखिन्छ । त्यसको फाइदा एमालेका पौडेललाई हुने छ ।
नेकपा एमाले रुपन्देही २ निर्वाचन परिचालन कमिटी संयोजक पुर्व सांसद नेत्र पन्थी सत्ता गठबन्धनबाट जो सुकै उम्मेदवार अघि सारेपनि एमालेको जित सुनिश्चित भएको बताउंछन् । ‘यो क्षेत्रमा गठबन्धनको सबैभन्दा ठूलो दलको उम्मेदवार भएको भएपनि एमालेलाई फरक पर्नेथिएन’–पन्थीले भने–‘जनमुक्तिका उम्मेदवारसंग हाम्रो पार्टीको प्रतिस्पर्धा नै हुंदैन,एमालेले यो क्षेत्रमा गरेका विकास निर्माणका दर्जनौ योजना हेरेर जनताले निर्णय गर्छन् ।’
रुपन्देहीलाई विकासमा देशकै रोल मोडेल बनाउने पौडेलसंग कसैको तुलना नहुने पन्थी बताउंछन् ।
आफू बलियो भएको क्षेत्र कमजोर दललाई छाडेको भन्दै कांग्रेसका नेता कार्यकर्ताहरु यहां असन्तुष्ट छन् । अर्कोतर्फ विभिन्न दल छाडेर एमाले प्रवेश गर्ने क्रम निरन्तर चलेको छ । यसले गर्दा एमालेका पौडेलको जितलाई रोक्न गठबन्धनको साथ पाएका जनमुक्तिका उम्मेदवारलाई सजिलो चांही छैन । बुटवल उपमहानगरको १ देखि १३, सैनामैनाको १ देखि ४ र तिलोत्तमाको १ देखि ६ नम्बर गरी २३ वटा वडा पर्ने रुपन्देही–२ मा प्रदेशसभा ९क० तर्फ ६४ हजार ४५२ र ९ख० तर्फ ६४ हजार २२५ जना गरी १ लाख २८ हजार ६७७ मतदाता रहेका छन् ।
रूपन्देही २ मा पर्ने बुटवल, सैनामैना र तिलोत्तमाका २३ वडामा स्थानीय तह चुनावमा वडाअध्यक्षहरुले पाएको मत अनुसार कांग्रेसको ३४ हजार ९५९, एमालेको ३३ हजार १८७, राप्रपाको ३ हजार ९२०, माओवादीको ३ हजार १८८, एकीकृत समाजवादीको १ हजार ३८२ र जसपाको १८३ हो । यो क्षेत्रमा राप्रपाले नेकपा एमाले उम्मेदवारलाई समर्थन गरेकाले दुई पार्टीको मत जोड्दा ३८ हजार ८७९ हुन्छ । यहां जनमुक्तिले जनमुक्ति वडास्तरमा २ हजार ७० मत पाएको छ, जुन सत्तारुढ गठबन्धन तर्फ जोड्दा ३९ हजार ८२७ पुग्छ, जुन एमाले–राप्रपा गठबन्धन भन्दा करिब एक हजार बढी हो ।
तर स्थानीय चुनाव यता सत्ता गठबन्धनमा आवद्ध दलका केन्द्रीय,प्रदेश र जिल्ला स्तरका एक हजार बढी नेता कार्यकर्ताहरु एमालेमा प्रवेश गरेका र प्रवेशको क्रम चलेकाले सत्ता गठबन्धनले कुनै हालतमा पौडेललाई चुनौति दिन नसक्ने एमाले रुपन्देही २ का संयोजक बाबुराम पन्थी बताउंछन् ।