खोज

नवलपुर, २८ भदौ ।

पूर्वी नवलपरासीको कावासोतीमा दसैँ मेला लाग्ने भएको छ । कावासोतीको विष्णुनगरमा दसैँ मेला संचालन हुने भएको हो । कावासोती नगरपालिका–६, मा रहेको प्रतिभा युवा क्लबले विष्णुनगरस्थित चौरमा दसैँ लक्षित गरी प्रथम विष्णुनगर दसैं मेला लाउने तयारी गरेको क्लबका अध्यक्ष सोवित रानाले बताए ।

आउँदो असोज १५ गतेदेखि २५ गतेसम्म दसैं मेला लाग्ने अध्यक्ष रानाले बताउनुभयो । एघार दिन सम्म चल्ने मेलामा सांस्कृतिक कार्यक्रम सहित विभिन्न प्रकारका सामग्रीका स्टलहरु समेत रहने अध्यक्ष रानाले बताए । राष्ट्रिय ख्यातिप्राप्त तथा स्थानीय कलाकारको दैनिक प्रस्तुती सहितका विभिन्न कार्यक्रमहरु मेलामा संचालन गरिने रानाको भनाई छ ।

प्रथम विष्णुनगर दसैँ मेलाबाट ग्रामीण क्षेत्रमा रहेका धार्मिक पर्यटकीय क्षेत्रको प्रवद्र्धन, स्थानीय उत्पादनको बजारीकरणमा सहया ेग पुग्ने अपेक्षा गरिएको मेला संयोजक झविन्द्र काफ्लेले बता । मेलाले युवाहरूको क्षमता विकासमा समेत सहयोग पुग्ने क्लबका सचिव पवन भुर्तेलले बताए । प्रतिभा युवा क्लबले यसअघि पनि विभिन्न सांस्कृतिक कार्यक्रमहरू गर्दै आएकोमा अहिले थप व्यवस्थित रुपमा ११ दिन सम्म कार्यक्रमहरू संचालन गर्न लागिएको उनले बताए ।

मेलामा बालबालिका लक्षित उद्यानसमेत रहनेछन् । मेलाबाट संकलित रकमबाट प्रतिभा युवा क्लबको भवन निर्माण गर्ने साथै सामाजिक कार्यमा खर्च गरिने अध्यक्ष रानाले बताए ।

एघार दिन सम्म चल्ने मेलामा ५० हजार दर्शकले अवलोकन गर्ने अपेक्षा गरिएको छ । मेलामा प्रवेश शुल्क एकसय राखिएको छ । विद्यार्थीका लागि परिचयपत्रको आधारमा असी र ज्येष्ठ नागरिक र अपाङ्गता भएका व्यक्तिलाई निःशुल्क प्रवेशको व्यवस्था गरिएको छ ।