खोज

प्युठान, २० भदौ ।
प्युठानको सरुमारानी–१ गनाह देखि स्वर्गद्वारीसम्म तीन वर्षमा २५ जनाको सडक दुर्घटनमा परी ज्यान गएको छ । नेपालको विभिन्न भूभाग र भारतीय पर्यटकहरूका आवागमन हुने मुख्य सडकमा पछिल्ला तीन आर्थिक वर्षमा २५ जनाको ज्यान गएको प्रहरीको तथ्यांक छ ।

तथ्यांक अनुसार ३३ वटा दुर्घटनाहरू घटेका छन् । गनाह देखि स्वर्गद्वारीसम्म सडकमा आर्थिक बर्ष २०७८÷०७९ देखि २०८०/०८१ सम्म ३ बर्षको अवधिमा ३३ वटा सवारी साधन दुर्घटनाका घटना, २५ जनाको मृत्यु र ४७ जना घाईते भएको जिल्ला प्रहरी कार्यालय प्युठानका प्रमुख प्रहरी निरीक्षक शरद के.सी.ले जानकारी दिए ।

तथ्यांक अनुसार दूर्घटनामा परी ११ पूरुष, ६ महिला, ८ बालकको ज्यान गएको हो । त्यसैगरी दूर्घटनामा गम्भिर घाइते हुनेको संख्या ४७ रहेको छ भने सामान्य घाइते पनि ४७ कै संख्यामा रहेको तथ्यांक रहेको छ । दूर्घटना हुने साधनहरू मध्ये सबै भन्दा बढी मोटर साइकल रहेका छन् । १९ वटा मोटरसाइकल, ७ वटा जीप, ५ वटा बस, २ वटा माइक्रोबस, २ ट्याक्टर र १ वटा टेम्पो गरी दूघटनामा पर्ने साधनको सङ्ख्या ३७ रहेको छ ।

भालुवाङ–प्युठान सडक २०४५ साल र भिंग्री–स्वर्गद्वारी सडक २०६४ सालमा निर्माण भएका हुन् । तर सडक सुधार प्रभावकारी नहुँदा सर्वसाधारण यात्रामा हैरानी व्यहोर्न बाध्य छन् । फराकिलो र गुणस्तरीय सडक नहुँदा दुर्घटना हुने गरेको छ ।

गतबर्ष जेठ २९ गते यहि सडकमा स्वर्गद्वारी दर्शन गरेर फर्किने क्रममा कार दुर्घटना हुँदा ८ जनाको ज्यान गयो । त्यसपछि यो सडक सुधारको विषयमा सम्बन्धित सरोकारवालापक्षहरूको चासो बढेको छ । गतबर्ष मात्रै सडक डिभिजन कार्यालय प्युठानको पहलमा सडक बोर्ड मार्फत ११ करोड बजेटको व्यवस्था गरेर सडक सुरक्षाको लागि भिंगृदेखि स्वर्गद्वारीको खण्डमा खर्च गरिएको सडक डिभिजन कार्यालय प्यूठानका सूचना अधिकारी राजेन्द्र कार्की जानकारीले दिए । टेण्डरमार्फत गरिएको उक्त बजेटवाट सडक सुरक्षाका लागि सडक मर्मत, ट्राफिक सेफ्टी, खाल्डाखुल्डी पुर्ने लगायतका कार्य भएको छ । तर सडकमा पहिरोले पुरिएर र भत्किएर पुनः समस्या भएका छन् ।

सडक डिभिजनसँगै सडक पूर्वाधार विकास कार्यालयमार्फत गत वर्ष ३ करोड ५४ लाख खर्च गरेको छ । उक्त रकमबाट यो सडक क्षेत्र अन्तरगत घडेरी र रुमालेमा पहिरो नियन्त्रण, ४ सय मिटर सडक सुरक्षा व्यारियर निर्माण र सडक मर्मतको काम भएको कार्यालय प्रमुख चन्द्र शाहले बताए । विभिन्न निकायबाट करोडौँ रकम खर्च भएपनि कम बजेट र दिगो योजनाको अभावमा यो सडकको समस्या दिगो रूपमा समाधान हुन अझै सकेको छैन । उता चकचके देखि गनाह खण्डमा पनि सडक फराकिलो बनाउने काममा सरकारको करोडौं रकम खर्चेपनि समस्या झन बल्झिएको छ । गर्जेनी, खहरे लगायतका ठाउँहरूमा पानी प¥यो की पहिरो झर्ने समस्याले रोल्पा, प्युठान, गुल्मी र स्वर्गद्वारी आउने पर्यटकहरूले समस्या झेल्दै आएका छन् । दाङको घोराही र भालुवाङ देखि स्वर्गद्वारी पुग्न सकिन्छ ।

बढी सङ्ख्यामा पर्यटकहरूले यात्रा भालुवाङ–चकचकेबाट गर्ने गर्दछन् । पछिल्लो समयमा महेन्द्र राजमार्ग जोड्ने भालुवाङ–प्युठान सडकमा समस्या देखिएको छ । सडक समस्याका कारण पर्यटक घटेको स्थानीय विष्णु खनालले बताए । ‘स्वर्गद्वारी आउने दर्शनार्थीको मुख्य समस्या सडक देखिएको छ’ खनालले भने,‘सुधारका लागि प्रभावकारी काम भएन ।’ प्युठानको भालुवाङ–प्युठान सडक पटक–पटक बन्द हुँदा पर्यटकहरू अलपत्र पर्ने समस्या झेल्दै आएका छन् । बाटो पार गरी भिंग्रीबाट माथि उक्लने क्रममा पुनः साँघुरो सडक, बिग्रेको सडकका कारण गाडीबाट उक्लेर धकेल्ने, त्रसित हुनु पर्ने समस्या भइरहेको छ ।