खोज

निर्माण सुरु गरिएका ठूला आयोजना समयमै सम्पन्न नहुने नेपालको पुरानो रोग अझैपनि कायमै रहेको बेला सिद्धबाबा सुरूङ मार्गले ब्रेक थ्रु गर्ने सुन्दा त्यस क्षेत्रमा जोखिम मोलेरै यात्रा गर्ने हजारौं यात्रुलाई खुसी बनाएको छ । भौतिक पूर्वाधार तथा यातायात मन्त्री देवेन्द्र दाहालले बुटवलमा आईतबार अबको सय दिनभित्रै सिद्धबाबा सुरुङमार्गको ‘ब्रेक थ्रु’ हुनेगरी काम भइरहेको बताउँदै गर्दा यात्रुमात्र होइन आम सर्वसाधारण नागरिकले खुसीको महसुस गरेका छन । ठूला आयोजना निर्माणमा ढिलासुस्ती हुन्छ भन्ने आमधारणालाई सिद्धबाबा सुरुङ मार्ग निर्माण योजनाले चिर्ने अपेक्षा गरिएको छ । बुटवल नारायणगढ सडक आयोजनाको काममा भैरहेको ढिलाईले चिन्ता उत्पन्न गरिरहेको बेला सिद्धबाबा सुरूङ मार्ग निर्माणले आम जनतामा पनि ब्रेक थु्र नै गरेको छ । मन्त्री दाहालको अभिब्यक्तिले निर्माणको क्षेत्रमा आशा उत्पन्न गरेको छ । सरकारले पुराना योजना सम्पन्न गर्नेतर्फ ध्यान केन्द्रित गरेको मन्त्री दाहालको अभिब्यक्ति अव सत्य सावित हुनुपर्दछ । सरकारले पनि निर्माण व्यवसायीलाई तिर्नुपर्ने पुरानो बक्यौता तत्काल भुक्तानी गरेर निर्माणको क्षेत्रमा देखिएको अन्यौल चिर्ने प्रयास गर्नुपर्दछ । पछिल्लोसमय अर्थतन्त्र केही सकारात्मक हुँदै गएकोले सरकारले निर्माण व्यवसायीलाई एक महिनाभित्रैमा सवै भुक्तानी चुक्ता गर्ने प्रतिवद्धता गरेको छ । अव असोज महिनादेखि पूर्वाधार निर्माणको कार्यले तीब्रता पाउने अपेक्षा गरिएको छ । आम जनताको अपेक्षा मुखरित बनोस् । मन्त्री दाहालले राजश्व संकलनमा कमी आएका कारण पुराना योजनाहरूको भुक्तानीमा केही समस्या भएको बताउँदै ती समस्या समाधान गर्न प्रधानमन्त्री केपी शर्मा ओली तथा अर्थमन्त्री विष्णुप्रसाद पौडेलबाट प्रतिवद्धताहरू आएसँगै एक महिनाभित्रै समस्याको हल हुने उल्लेख गरेका छन् । मन्त्री दाहालको भनाईले अव असोज महिनादेखि नेपालमा निर्माणको क्षेत्रले गति लिने विश्वास गरिएको छ ।

प्रारम्भिक चरणको निर्माणको काम सुरू हुँदै गर्दा गत बर्ष सिद्धबाबा सुरुङ मार्गको प्रवेशद्वार नै पहिरोले क्षतिग्रस्त बनाएपछि यसको भबिष्यलाई लिएर चिन्ता उत्पन्न भएको थियो । तर, निर्माण कम्पनीले समयमै काम सुरु गरेकोले सिद्धबाबा सुरुङ मार्गले गति लिने आशा सिर्जना भएको थियो । निर्माणको ठेक्का पाएको चाइना स्टेट कन्स्ट्रक्सन इन्जिनियरिङ कर्पोरेसनले जसरी काम गरिरहेको छ, त्यो कामलाई अझै केही महिना यही रफ्तारमा अगाडी बढाउने हो भने निश्चितरूपमा सिद्धबाबा सुरुङ मार्गले ‘ब्रेक थु्र’ गर्नेमात्र छैन, अरू निर्माण कम्पनीलाई पनि समयमै काम सम्पन्न गर्नुपर्दछ भन्ने सन्देश जानेछ । बुटवलदेखि दोभानसम्मको करिव तीन किलोमिटर सडक बर्षौदेखि उच्च जोखिममा छ । हरेक बर्ष त्यहाँ मानवीय क्षति हुने गरेको छ । यस्तै नियती बर्षाैदेखि त्यस क्षेत्रमा यात्रा गर्नेहरूले भोग्दै आएका छन् । करिव डेढ किलोमिटर लामो सुरूङ मार्ग निर्माण सम्पन्न भएमा अत्यन्त जोखिम मानिएको सिद्धबाबा क्षेत्र सुरक्षित हुने आशा गरिएको छ । यो सडकबाट दैनिक झन्डै आठ हजार सवारी साधन आहोरोदोहोर गरिरहन्छन ।

यति धेरै सवारी साधनको आवतजावत हुने यस क्षेत्रको सडक जोखिमले भरिएको छ । यो सडकमा यात्रुले सास्तीमात्र पाएका छैनन, व्यवसायीले आफ्नो लगानी हत्केलामा जोखिम मोलेर चलाईरहेका छन । तसर्थ यो सुरूङ मार्ग राष्ट्रिय गौरवको आयोजनामात्र होइन, यस क्षेत्रका जनताका लागि जीवनबुटी पनि हो यो आयोजना । बुटवल नारायणगढ सडक खण्डको नियति हामीले बिगत पाँच बर्षदेखि भोगिरहेका छौं । सरकारले निर्माण पक्ष चाईना स्टेट कन्सट्रक्सनलाई पटकपटक ताकेता गर्दा पनि सडक निर्माणले गति लिन सकिरहेको छैन । यही बेला निर्माण कम्पनी नै भागेर गएको अवस्थामा सरकारले दिएको चेतावनीपछि फेरी फर्किएर आएको छ । कम्तिमा सिद्धबाबा सुरुङ मार्ग निर्माणको कामले यो बिबसता भोग्नुपरेको छैन । यो सुरुङ मार्गले तराईलाई पहाड र हिमालसंग समेत जोड्ने भएकोले यसको निर्माणको कामलाई लिएर साझा चिन्ता ब्यक्त भैरहँदा सय दिनमै यसको ब्रेक थ्रुको समाचार सार्वजनिक हुनु खुसीको कुरा हो । अव सरकारले समेत यो आयोजना छिटो सम्पन्न गर्न चासो र चिन्ता ब्यक्त गरेकोले निर्धारित समय अगावै सिद्धबाबा सुरुङबाट सवारी चल्ने आशा र विश्वास गरिएको छ ।