खोज

सल्यान, ६ कार्तिक । सल्यानको कपुरकोट गाउँपालिकाभित्र १८ वर्ष सम्मका शारीरिक अपांगता भएका बालबालिकाको निःशुल्क उपचार हुने भएको छ । गाउँपालिका र विकलांग मित्र समूह तथा अपांग वाल अस्पताल पुनस्र्थापना केन्द्र बनेपाको सहकार्यमा अपांगता भएका वालवालिकाको निःशुल्क उपचार हुने भएको हो ।
जसका लागि पाँच वर्षिय सम्झौता गरिएको छ । सम्झौता अनुसार गाउँपालिकाले आफ्नो पालिकाभित्रका १८ वर्ष सम्मका शारीरिक अपांगता भएका बालबालिकाको पहिचान, उपचार, शल्यक्रिया, पुनस्र्थापना,सहायक सामाग्री तथा कृत्रिम अंग उपलब्ध गराउने छ । यसका साथै नियमित अनुगमन तथा लक्षित समुह भित्रका नागरिकहरुको समग्र सामाजिकीकरणको लागि पनि क्रियाकलापहरु सञ्चालन हुने भएको गाउँपालिकाका प्रमुख प्रशासकीय अधिकृत भरत कुमार वलीले जानकारी दिए ।
अपांगता पहिचानको लागि स्वास्थ्य तथा पुनस्र्थापना घुम्ति शिविर सञ्चालन तथा जसको लागि आवश्यक प्रचार, औषधि, मेडिकल सामग्री, यातायातको व्यवस्था गाउँपालिकाले गर्ने छ । अपांगता भएका व्यक्तिलाई आवश्यक पर्ने सहायक सामग्रीहरु हात खुट्टा लगाएतका कृत्रिम अंगहरु, ह्वील चियर, वाकर, बैशाखी, काम्रो आदी सामग्री निःशुल्क नै उपलब्ध गराउने कार्यक्रम रहेको छ । अपांगता भएका व्यक्तिहरुको संरक्षण, शशक्तिकरण र विकासका लागि यस प्रकारको सम्झौता गरिएको गाउँपालिकाले जनाएको छ । शल्यक्रिया आवश्यक पर्ने बालबालिकाको लागि अस्पतालमा लाग्ने निदानात्मक, शल्यक्रिया, औषधी, मेडिकल सामग्री, वेड तथा खाना वापत लाग्ने खर्चको समेत व्यवस्था हुने प्रमुख प्रशासकीय अधिकृत वलीले जानकारी दिए ।गाउँपालिकासंग सहकार्य गरेको विकलांग मित्र समूह तथा अपांग वाल अस्पताल पुनस्र्थापना केन्द्रले स्वास्थ्य तथा पुनस्र्थापना घुम्ति शिविर संचालनको लागि विशेषज्ञ लगायत मानव संसाधन, आवश्यक औषधि, मेडिकल सामग्रीहरु आदि उपलब्ध गराउने छ । केन्द्रले सहायक सामग्रीहरुको नाप जाँच र तयार लगाएतका अन्य विभिन्न काम पनि गर्ने केन्द्रका सिबिआर सुपरभाइजर होमराज केसीले जानकारि दिए । गत वर्ष पनि केन्द्रले कपुरकोट गाउँपालिकासंगको सहकार्यमा अपांगता भएका व्यक्तिहरुको उपचारका लागि विभिन्न कार्यक्रमहरु सञ्चालन गरेको थियो । कपुरकोट गाउँपालिकामा मात्रै हाल तीन सयको हाराहारीमा अपांगता भएका व्यक्तिहरुको पहिचान भएको सुपरभाइजर केसीले जनाए ।