खोज

जिल्लाका गाउँ तथा नगरपालिकामा विरतण गरिएको गरिव परिचयपत्रको विरोध भएको छ । गरिव धनी र धनी गरिवको सूचिमा परेपछि नागरीकहरूले विरोध जनाएका हुन् । विवादकै बीच केही स्थानीय तहले परिचयपत्र वितरणको कामलाई अन्तिम चरणमा पु¥याएका छन् । स्वर्गद्धारी नगरपालिका र ऐरावती गाउँपालिकाले वितरणको काम झण्डै ९० प्रतिशत सकेको जनाएका छन् । तर, गौमुखी गाउँपालिकाले वितरण गर्न नपाउँदै विरोध आएपछि स्थगित गरेको छ । जिल्लाका अन्य स्थानीय तह वितरणको तयारीमा रहेको जानकारी गराएका छन् ।
सोमवारदेखि परिचयपत्र वितरणको तयारीमा रहेको माण्डवी गाउँपालिकाका प्रमुख प्रशासकिय अधिकृत नारायण पौडेलले जानकारी दिए । ‘करिव तीन हजार परिचयपत्र आएका छन्’,उनले भने,‘विवाद छ । गाउँपालिकाले संशोधन गर्न मिल्दैन् ।’ ‘परिचपयत्रप लिएर गाउँमा गएका थियौँ’,गौमुखी गाउँपालिका अध्यक्ष विष्णु कुमार गिरीले भने,‘स्थानीयले बाढ्न दिएनन् । हाललाई स्थगित भएको छ ।’ सर्वपक्षिय छलफलबाट निष्कर्ष नआउँदासम्म परिचयपत्र वितरण नगरिने उनको भनाई छ । अर्खा, खुङ र लिवाङमा परिचपय वितरण गर्न जाँदा विरोध आएको उनले बताए । भूमी व्यवस्था, सहकारी तथा गरिबी निवारण मन्त्री पदमा अर्यालले टेलिफोन गरेर परिचयपत्र वितरण नगर्न निर्देशन दिएको समेत उनले जानकारी गराए ।
पाँचवर्ष अघि जिल्लामा गरिव परिचयपत्रका लागि फाराम संकलन गरिएको थियो । जिल्लामा १४ हजार जनाका लागि तीन थरीका परिचपयत्र आएका छन् । विवादै विवादमा केहीले वितरण गरेपनि सर्वपक्षिय निकास निकाल्ने सोँच बनाएको जिल्ला सम्वन्य समिति प्यूठानका सम्वन्य अधिकारी उमा गौतम कोइरालाले जानकारी गराइन । परिचयपत्र त्रुटि भएर आएको उनले स्वीकार गरिन् । कोइरालाका अनुसार छुटेका गरिवहरूको तथ्यांक स्थानीय सरकारले गरेपनि सच्चाउने अधिकार नभएको उल्लेख गरिन् । अति गरिवलाई रातो, मध्यमलाई पहेलो र सामान्यलाई हरियो परिचयपत्र वितरण गरिनेछ । असन्तुष्टि हुँदाहुँदै पनि परिचयपत्र वितरणको काम लगभग सकिन थालेको ऐरावती गाउँपालिका उपाध्यक्ष बुद्ध बहादुर बस्नेतले बताए । एक हजार चारसय जनाको परिचयपत्र आएकोमा हालसम्म एक हजार एकसय पचास जनालाई प्रदान गरिएको उनले जानकारी गराए । केही दिनभित्रै सवै वितरण गरेर सक्ने योजना रहेको उनले बताए । जनप्रतिनिधी र कर्मचारीहरू गाउँमै पुगेर परिचयपत्र वितरण गरिरहेका छन् । गलत परिचय पत्र सच्याउने विषयमा जनप्रतिनिधीलाई केही अधिकार नभएको समेत उनको भनाई छ । झिमरुक गाउँपालिकाले गरिवको सूचिमा परेका व्यक्तिहरूलाई गाउँपालिकाको कार्यालय मच्छिमा बोलाएर परिचयपत्र वितरण गरेको छ । वडामै वितरण हुनुपर्ने स्थानीयले माग गरेपनि कर्मचारी अभावमा पुग्न नसकिएको प्रमुख प्रशासकिय अधिकृत ताराकिरण केसीले जानकारी दिए ।

परिचयपत्र लिन गाउँपालिका कार्यालय मच्छिमा आएका झिमरुकबासी । तस्विर : बुटवल टुडे