खोज

नेपालगन्ज उपमहानगरपालिका भित्र फोहोर व्यवस्थापनमा घरधनीले नै असहयोग गरेपछि यहाँका वडा अध्यक्षले त्यस्ता घरधनीलाई ‘ठाउँको ठाउँ’ जरिवाना गराउन थालेका छन् । शुक्रबार नेपालगन्ज उपमहानगरपालिका—१८ का अध्यक्ष दिपक बर्माले कारकाँदोचोकमा वरपरका फोहोर व्यवस्थापन नगर्ने घरधनीलाई जरिवाना गराए । उपमहानगरका नगर रक्षक, कर्मचारी सहितको टोली लिएर बर्मा अनुगमनमा निस्किए । सुर्खेतरोडमा रहेको होण्डाको सोरुम अगाडि फोहोर थुपारेको देखियो । त्यसअघि पनि उक्त सोरुमले फोहोर व्यवस्थापन गर्न दिएको चेतावनी अटेरी गरेको पाइएको छ । पटक—पटकको चेतावनीलाई बेवास्ता गर्दै फोहोर राखिरहेपछि वडा अध्यक्षले होण्डा सोरुमलाई १५ हजार जरिवानाको पत्र थमाए । वडा अध्यक्ष बर्माले जथाभावी फोहोरको थुप्रो नराख्न चेतावनी समेत दिएका छन् । होण्डाको आधिकारिक बिक्रेता यज्ञलक्ष्मीका प्रोपराईटर रबिन्सन श्रेष्ठ फोहोर व्यवस्थापनका लागि आफूले कुनै कमजोरी नगरेको बताए । उनले नगरपालिकाका कर्मचारीको असहयोगका कारण फोहोर व्यवस्थापन हुन नसकेको जानकारी दिए । वडा अध्यक्ष बर्माले आफ्नो क्षेत्रमा फोहोर व्यवस्थापन नगर्ने जोकोहीलाई जरिवना कारबाही गर्ने बताएका छन् । नेपालगन्जमा फोहोर व्यवस्थापन चुनौतीपूर्ण बन्दै गएको छ । कर्मचारीको स्थानीय र उपमहानगरपालिकाका कर्मचारीहरूको लापरबाहीका कारण व्यवस्थापन हुने फोहोर पनि शहरमा थुप्रो भएर बसेको देखिन्छ ।