खोज

काठमाडौं,३ कात्तिक । रुपन्देही २ मा प्रतिनिधि सभा सदस्यमा हाम्रो नेपाली पार्टीको चुनाव चिन्ह लौरो लिने गरी उम्मेदवारी दर्ता गराएका निकोलस भनिने कमल भुसालको मुद्दामा सर्वोच्च अदालतले अन्तरिम आदेश दिन अस्वीकार गरेको छ । निर्वाचन अधिकृतको कार्यालयले उनको उम्मेदवारी खारेज गरेपछि उनी सर्वोच्च गएका थिए । उनको मुद्दा न्यायाधीश कुमार रेग्मीको इजलाशमा परेको थियो । उम्मेदवारी खारेज बदर गरी पाउं भन्ने उनको माग अनुसार अदालतले अन्तरिम आदेश नदिएपनि कार्तिक १५ गते दुबै पक्षलाई छलफलका लागि बोलाएको छ । भुसालको पक्षमा अधिवक्ताहरु भिमार्जुन आचार्य र दिनेश त्रिपाठीले र विपक्षमा अधिवक्ता सुरेन्द्र भण्डारीले वहस गरेका थिए ।
अन्तरिम आदेश नदिएसंगै भुसालको उम्मेदवारी खारेजी कायम रहेको र उनले कात्तिक १५ गतेसम्म प्रचार प्रसार गर्न नपाउने निर्वाचन कानुनले भनेको छ । चिकित्सा शास्त्र अध्ययन संस्थान आईओएमका विद्यार्थी भुसाल संस्थानलाई जानकारी नै नगराई उम्मेदवारी दर्ता गरेका थिए ।

उनले आफू स्वतन्त्र भनेपनि अनन्तराज घिमिरे अध्यक्ष रहेको हाम्रो नेपाली पार्टीको चुनाव चिन्ह लौरो लिने घोषणा गरेका थिए । भुसाल चिकित्सा शास्त्र अध्ययन संस्थान शिक्षण अस्पतालमा एमडी तहमा अध्ययनरत विद्यार्थी हुन्। उनले बिदामा बस्नका लागि निवेदन दिए पनि उम्मेदवारी दिनेबारे संस्थानलाई जानकारी नगराएको संस्थान स्रोतले बताएको छ । नेपाल सरकारले उपलब्ध गराएको छात्रवृति कोटामा चिकित्साशास्त्र अध्ययन गरिरहेकाले सरकारबाट आर्थिक लाभ लिइरहेको भन्दै उनीविरुद्ध उजुरी परेको थियो ।