खोज

बुटवल, ४ बैशाख । नयाँ बर्ष : नयाँ सेवा भन्ने सन्देशसहित यात्रुलाई सुबिधायुक्त र गुणस्तरिय सेवा प्रदान गर्ने उद्देश्यले बुटवलमा आईसर मजिस्टेक वाई बसका च्यासिस हस्तान्तरण कार्यक्रम सम्पन्न भएको छ । मोविलिटी र गुणस्तरमा बिश्वासिलो र टिकाउ मानिएको आईसर कम्पनीको अधिकृत बिक्रेता बतास एम.ए.डब्लु नेपालले च्यासिस् खरिदकर्ताहरुलाई एक समारोहका बिच चावी हस्तान्तरण गरेका छन ।

पश्चिम नेपाल बस ब्यबसायी प्रा.लि.मा आवद्ध संचालक तथा ब्यबसायीहरुले नवबर्ष २०८२ को शुभारम्भका अवसरमा एकै पटक १२ वटा आईसर मजिस्टेक वाई नामक प्रिमियम बसका च्यासिस खरिद गरेका छन । पश्चिम नेपाल बस प्रा.लि.का संचालक नारायण घिमिरेले ३ वटा, नारायण भण्डारीले ३ वटा, ब्यबसायी ऋषिराम डुम्रे ३ वटा, देवराज खनाल २ वटा, मदनप्रताप सिंह १ वटा च्यासिस् खरिद गरेका हुन ।

च्यासिस् खरिदकर्ताहरुलाई चावी हस्तान्तरण गर्दै आईचर नेपालका प्रमुख कार्यकारी अधिकृत हेमन्त पुराणिकले आईसर मजिस्टेक वाई प्रिमियम बस मोबिलिटीमा विश्वासिलो र दिर्घकालिन क्षमताको भएको बताए । ब्यबसायीहरुले गरेको बिश्वास प्रति सँधै नतमस्तक भै सेवारत रहने प्रतिबद्धता समेत उनले ब्यक्त गरे ।

सो अवसरमा पश्चिम नेपाल बस प्रा.लि.का अध्यक्ष दधिराम खरेलले यात्रुबाहक बसको संख्या मात्र बढाउनेमात्र नभई ब्यबस्थापन मुख्य चुनौती भएको बताए । ब्यबस्थापनको बिधि र प्रकृया तर्जुमा गर्न कठिनाई भएपनि यात्रुहरुको हितमा राखेर गुणस्तरिय सेवा र सुबिधा प्रदान गर्ने उनले प्रतिबद्धता ब्यक्त गरे ।

सो अवसरमा संचालक नारायण घिमिरेले आईसर मजिस्टेक वाई प्रिमियम बस समय सुहाउदो, यात्रुको चाहना अनुरुपको, बिश्वसनिय र भरपर्दो रहेको टिप्पणी गरे । अर्का संचालक नारायण भण्डारीले समय माग अनुरुप सेवालाई स्तरिय बनाउने उद्देश्यका साथ नयाँ बर्ष : नयाँ सेवा भन्ने सन्देशका साथ आएको जानकारी गराए ।

कम्पनीका बिक्रि प्रबन्धक रघु पौडेलका अनुसार नयाँ बर्षको प्रारम्भमै कम्पनीले लुम्बिनी प्रदेशमा १२ करोडको कारोबार गरेको छ । अर्का प्रबन्धक सन्तोष थापाले ब्यबसायीहरुले गरेको बिश्वासलाई कमि हुन नदिने बताए । यसअघि नेपालगन्जमा ११ वटा चावी हस्तान्तरण गरेको छ ।