खोज

नेपाली कथानक चलचित्र पुजारसार्की नेपाली दर्शकमाझ निकै लोकप्रिय बन्न सफल भएको छ । दर्शकले रुचाएको चलचित्रको सूचिमा पुजारसार्कीपनि परेको छ । नेपालको अहिलेको वास्तविक जीवनको चरित्र पुजारसार्की चलचित्रले बोकेको छ । नेपाल जति नै छुवाछुत मुक्त देश भनिएपनि त्यो व्यवहारमा अझै लागू नभएको कुरा पुजारसार्की कथानक चलचित्रले प्रस्तुत गरेको छ । पुजारसार्की त निर्माताले जस्तो बनायो त्यस्तै पर्दामा उतारिएको छ, त्यो भन्दापनि बढी जातीय विभेदको खाडल नेपाली समाजमा छ । पुजारसार्की नेपालको वास्तविकमा आधारित यथार्थबादी चलचित्र हो । चलचित्रमा प्रस्तुत कथा नेपाली समाजको वास्तविकतासंग मेल खान्छ । दलित र गैर दलितबीचको प्रेम सम्बन्ध र अन्तरजातिय विबाहलाई मूल कथा बनाइएको छ । नेपालबाट अझैपनि बालविवाह, छाउपडी प्रथा, उचनिच, बिभेद लगायतका कुप्रथा हट्न सकेको छैन । त्यसैगरी बोक्सीको आरोपमा कुटपिटका घटना पनि न्यूनीकरण हुन सकेको देखिँदैन । समाजमा यस्ता अन्धविश्वासी कुप्रथाहरूले सदियौंदेखि जरा गाडेर बसेको छ । यसलाई उन्मूलन गर्न नसकिएपनि न्यूनीकरण भने अवश्य गर्न सकिन्छ । यसका लागि जनचेतना नै पहिलो आवश्यकता हो । पुजारसार्की चलचित्रले नेपाली समाजमा चेतनाबृद्धिमा धेरथोर योगदान पु¥याउँछ । बिडम्बना यतिखेर नेपालले राजनीतिक हिसाबले धेरै कोल्टे फेरिसकेको छ । देश राजनीतिक रूपमा धेरै माथि बढ्यो तर समाज जहाँका तहीँ छ । अतः समाजमा रहेका यस्ता कुप्रथाहरू नियन्त्रण गर्नु जरुरी छ । त्यसो त कुप्रथा, अन्धविश्वास र रुढीबादी जनचेतना एवं शिक्षाको कमी भएका स्थानहरूमा बढी देखिएका छन् । नेपाली समाजमा बालविवाहका घटनाका न्यूनिकरण हुन सकेको छैन । २० बर्ष पारी बिहाबारी भनिएपनि दुर्गम बस्तीमा १५–१६ बर्षकै उमेरमा विवाह गरिदिने चलन छ । त्यसमाथि अन्तरजातीय विवाहलाई कुनैपनि मानेमा स्वीकार नगर्ने समाज हाम्रै छ । दुर्गम बस्तीमा जातीय विभेदको घटना अझै धेरै हुने गरेका छन ।

पुजारसार्कीमा देखाएजस्तै दलित र गैर दलितबीचको प्रेमलाई कुनैपनि मानेमा स्वीकार नगर्ने अवस्था कायमै छ । नेपाली समाज जति नै परिवर्तनशील, उन्नत र बिकसित भएपनि जातीय छुवाछुतको प्रथा सजिलै हटने अवस्था देखिदैन् । पुजारसार्की चलचित्रमा यी धेरै बिषयबस्तुलाई कथामा टपक्क उनेर पर्दामा उतारिएको छ । रुढीबादी अन्धविश्वासले नेपाली समाज जकडिएको छ । बोक्सी, भुतप्रेतको नाममा समाजमा उपल्लो जातिले तल्लो जातिलाई यातना दिने काम अझै रोकिएको छैन । बिज्ञानले बोक्सी र भुतप्रेत अस्वीकार गर्दछ तर नेपाली रुढीबादी समाज त्यसैको जरोमा टेकेर समाजका छिद्र खोतल्न तल्लिन छ । चलचित्र पुजारसार्कीले नेपाली समाजको वास्तविकता पस्किएको कुरामा कुनै बिबाद छैन । जातीय र सामाजिक रूपको अन्धविश्वास तोड्नेतर्फ अव अघि बढ्नैपर्दछ भन्ने चलचित्रको सन्देश हो । चलचित्रले सही बेलामा सही सन्देश दिएको छ । नेपाली समाजलाई यस प्रकारका कुप्रथाबाट माथि उठाउने हो भने विभेदविरुद्धको अर्को क्रान्तिको आवश्यकता छ । चलचित्रले नेपाली समाजको वास्तविकतामात्रै पस्किएको छ । बिद्रोहको आवश्यकताबोधका बिषयमा चलचित्र मौन छ । त्यो चलचित्रको कमजोर पक्ष हो । अहिलेको सवैभन्दा ठूलो आवश्यकता भनेको चेतनाको हो । तसर्थ चलचित्र पुजारसार्कीले नेपाली समाजलाई चेतनशील चाहिँ बनाएको छ । अव त्यही चेतनाको जगमा विभेद, कुरीति र कु–संस्कार निर्मूल गर्नेतर्फ लाग्नु जरुरी छ ।