खोज

रोल्पा नगरपालिका–४ शिवालयकी विमला श्रेष्ठको लक्ष्य नेपाली सेनामा भर्ना भएर देशको सेवा गर्ने रहेको छ । तारा माध्यमिक विद्यालयको कक्षा ९ मा अध्ययनरत श्रेष्ठ अहिले नेपाली सेनाले संचालन गरेको राष्ट्रिय सेवा दलको तालिममा सहभागिता जनाइरहेकी छिन् । सोही विद्यालयका अर्का विद्यार्थी खड्क बहादुर बुढाको पनि सेनामा भर्ति भएर देश र जनताको सेवा गर्ने चाहाना छ । उच्च शिक्षा अध्ययन पश्चात नेपाली सेनाको अधिकृतमा प्रतिस्पर्धा गर्ने लक्ष्य बोकेका उनले पनि राष्ट्रिय सेवा दलको तालिम लिइरहेका छन् ।
विमला र खड्कबहादुर जस्ता ३६ जना विद्यार्थीले अहिले तारा मावि वामरुकबाट राष्ट्रिय सेवा दलको एक सय दिने तालिम लिइरहेका छन् ।
विद्यालयले १ महिना लामो वर्षे विदा गरेको छ तर उनीहरू भने विदाको समयमा पनि विद्यालय जान्छन । दैनिक विहान १० वजे देखी वेलुका ५ वजेसम्म विद्यालय पुगेर तालिममा सहभागि हुने गर्दछन । यस वर्ष सो तालिममा १८ छात्र र १८ छात्रा तालिममा सहभागि भएको विद्यालयले जनाएको छ ।
तालिम दिनका लागि नेपाली सेनासंग हरेक वर्ष ३६ जनाको मात्रै कोटा हुने भएपनि तालिम लिन चाहाने विद्यार्थीको संख्या भने धेरै रहने गरेको वताइएको छ । धेरै विद्यार्थीले तालिम लिन चाहाना राखे पनि सवैलाई तालिममा सहभागी गराउन नसक्ने भएकाले निश्चित मापदण्डका आधारमा छनौट गर्ने गरेका छौ तालिम प्रशिक्षक तेजवहादुर थापाले भने । पेशागत दक्षताका एवम शारिरिक, मानसिक र वौद्धिक विकासमा समेत तालिमले सहयोग गर्ने भएकाले पनि विद्यार्थीको आकर्षण देखिन्छ थापाले भने ।
युवाहरूलाई अनुशासित वनाउने, ईमान्दार र निष्ठावान बनाउँदै देश र देशबासी प्रति बफादार बनाउने उद्देश्यका साथ नेपाली सेनाले हरेक वर्ष विद्यार्थीहरूलाई सैन्य तालिम दिने गर्दछ । सेनाको पोशाकमा रहने ती विद्यार्थीले शारीरिक व्यायाम, सैन्यकला तथा अन्य महŒवपूर्ण विषयको तालिम लिने गर्दछन । एक सय दिनको कोर्ष रहने सो तालिम ७९ दिन विद्यालयमा गरिन्छ भने २१ दिन जिल्ला वाहिर क्याम्पीङ गरिन्छ । जिल्ला वाहिर लगेर गरिने २१ दिने तालिममा अन्य जिल्लामा तालिम लिईरहेका विद्यार्थीहरू वीच विभिन्न विषयमा अनुभव आदान प्रदान तथा प्रतिस्पर्धा समेत गरिदै आएको वताइएको छ । तालिममा उत्कृष्ट एक छात्र र एक छात्रालाई श्रीलंका र भारत भ्रमणको समेत व्यवस्था मिलाउने गरिँदै आएको छ ।
विद्यालय संचालन भएको वेला दैनिक १ घण्टा र विद्यालय वन्द भएको बेला दैनिक ७ घण्टाका दरले तालिम गरि एक सय दिन भित्र तालिमको कोर्ष पुरा गर्दै आएको वताइएको छ । जिल्लामा वालकल्याण नमूना माविमा अघिल्ला ३ वर्षमा यस्तो तालिम चलेको थियो । अघिल्लो वर्ष र यस वर्ष तारा मावि वामरुकमा तालिम चलेको आयोजकले वताएका छन । अघिल्ला वर्ष तालिम लिएका मध्ये केही नेपाली सेनामा भर्ना भईसकेको वताइएको छ । तालिमले स्वास्थ्य सन्तुलन र भर्ना प्रकृयाका वारेमा सहजता दिने भएकाले सेनामा भर्नाको आकर्षण बढेको वताइएको छ ।
अध्ययन र तालिमलाई साथसाथै अगाडी वढाईरहेको छु पढाई सकेपछि सेनामा भर्ना हुने चाहाना छ सोही विद्यालयकी सोभा विष्टले भनिन । तालिमवाट आफुहरूमा सैन्यकला, अनुशासन र शारिरीक स्फूर्ती समेत वढेको छ विष्टले भनिन । शारिरी व्यायाम, दौड, एथलेटिक्स तथा सांस्कृतिक कार्यक्रम समेत गरिने भएकाले अतिरिक्त कृयाकलापमा समेत विद्यालयले जिल्ला स्तरमा हुने प्रतिस्पर्धाहरूमा विभिन्न स्थान ल्याउन सफल भएको विष्टले जानकारी दिईन ।
तत्कालिन राजा विरेन्द्रको पालामा सुरु गरिएको राष्ट्रिय सेवा दलको तालिम रोल्पा जिल्ला सम्म आईपुग्न भने धेरै समय लाग्यो । विगत ५ वर्ष यता भने जिल्लामा निरन्तर यस्तो तालिम चलिरहेको छ । तालिमवाट जिल्लाका २ वटा विद्यालयका झण्डै ३ सय विद्यार्थी लाभान्वित भइसकेको बताइएको छ ।