खोज

तिलोत्तमा,२७ पुस । केन्द्रमा सत्ता पक्ष र प्रतिपक्ष जे भएपनि स्थानीय स्तरमा नेकपा एमाले र नेपाली कांग्रेसबीच पदीय भागबण्डा गरेर वर्षौंदेखि पार्षद र पदाधिकारी चयन हुंदै आएको आनन्दवन शंकरनगर खानेपानी संस्थामा पहिलोपटक आम उपभोक्ताबाट पार्षद चयन भएका छन् । तिलोत्तमाका अन्य खानेपानी संस्था, सामुदायिक बन र सिंचाई कुलोमा समेत यी दुई दलबीच पालैपालो संस्थाको नेतृत्व लिने गरी भागबण्डा चल्दै आएको छ ।

उपभोक्ता समिति तहका सार्वजनिक संस्थाहरु समेतमा सीमित दलको मिलेमतोविरुद्ध आनन्दवन शंकरनगर खानेपानी संस्थामा यसपाली पहिलोपटक विद्रोह भएको छ । ९ वटै सेवा क्षेत्रमा चुनाव गरी पार्षद र क्षेत्रीय संयोजकको चुनावमा उपभोक्ताले दलीय गठबन्धनलाई अस्वीकार गर्दै एक्लै लडेको रास्वपा, जनमुक्ति र स्वतन्त्र उम्मेदवारलाई जिताएका छन् । संस्थाको नेतृत्वमा कांग्रेस र एमालेले मात्रै भागवण्डा गरेर अन्य दललाई एक, दुई जना सदस्य र पार्षद दिने रणनीति बनेपछि माओवादी केन्द्र सहित राष्ट्रिय जनमुक्ति पार्टी,जनमुक्ति लगायत अन्य दलहरुको मोर्चा बनेको थियो । तर लगत्तै माओवादी पनि कांग्रेस एमाले गठबन्धनमा मिसिन गएको थियो ।
तीन ठूला दलको गठबन्धनलाई चुनौति दिंदै रास्वपाले चुनावमा जानुपर्ने अडानपछि संस्थामा पहिलोपटक पूर्ण चुनाव भएको रास्वपा तिलोत्तमा सभापति रुस्तम कंडेलले बताए ।

९९ पार्षद र ९ जना क्षेत्रीय संयोजक (जो संस्थाको कार्यसमितिमा पदेश सदस्य हुन्छन् ) को चुनावमा सत्ता पक्ष र प्रतिपक्षको गठबन्धन लाई राष्ट्रिय स्वतन्त्र पार्टी, राष्ट्रिय जनमुक्ति पार्टी र कांग्रेसकै बागी उम्मेदवारले राम्रै चुनौति दिए । ९ जना क्षेत्रीय संयोजक मध्ये तीनजना गठबन्धन इतरका उम्मेदवार विजयी भए । जसमा क्षेत्र नं ३ र ८ मा राष्ट्रिय स्वतन्त्र पार्टीका क्रमशः लक्ष्मण मल्ल र डिल्लीराज गौतम विजयी भए । यस्तै सेवा क्षेत्र १ बाट कांग्रेसका बागी बाला कुंवर विजयी भए । क्षेत्र नं १ को संयोजकमा तीन दलको साझा उम्मेदवार कांग्रेसका डोलराज भण्डारीलाई स्वतन्त्र उम्मेदवार बाला कुंवरले दोब्बर मतले पराजित गरे ।
भण्डारीले ७२ मत पाउंदा कुंवरले १३३ मत पाए भने जनमुक्ति पार्टीका चन्द्रबहादुर श्रीसले ७४ मत ल्याए ।
सेवा क्षेत्र नं. ३ मा गठबन्धनबाट एमालेका रुकु पाण्डेलाई हराउंदै रास्वपाका लक्ष्मण मल्ल विजयी भए । यस्तै सेवा क्षेत्र नंं ८ मा गठबन्धनका सूर्य बन्जाडेलाई हराउंदै रास्वपाका डिल्लीराज गौतम विजयी भए ।

९९ पार्षदमा रास्वपाबाट १४ जना र जनमुक्तिका ४ जनाले तीन दलीय गठबन्धनका उम्मेदवारलाई पराजित गरेका छन् । गठबन्धनबाट क्षेत्र नं २ संयोजकमा गणेश गुरुङ,४ मा गोकर्ण भुसाल,५ मा जगत पौडेल,६ मा टिकाराम चापागाई, ७ मा केशव कोइराला र ९ मा विकास पाण्डे विजयी भएका छन् ।
क्षेत्रीय संयोजकमा निर्वाचित पार्षदहरु स्वतः कार्यसमति सदस्य हुन्छन् । रास्वपा तिलोत्तमाका अध्यक्ष रुस्तम कंडेलले तीन दल मिलेर भागबण्डा गरी खानेपानी जस्तो सार्वजनिक संस्थामा रजाई गर्न अरु दललाई जबरजस्ती बेवास्ता गरेर जान खोजेपछि आफूहरुले चुनावको माग गरेपछि वाध्य भएर सबै क्षेत्रमा चुनाव भएको बताए ।

सत्ता पक्ष र प्रतिपक्ष मिलेर आफू अनुकुलका दलकै मान्छे निर्वाचन समितिमा राखेर चुनावलाई प्रभावित पार्न र धांधलीजन्य काम गरेर एकलौटी गर्न खोजेपनि सचेत उपभोक्ताले आंशिकरुपमा असफल बनाइदिएको बताए ।
‘निर्वाचन समितिले निर्वाचन आचार संहिता विपरित, गोपनियता विपरितका काम गर्ने देखि मतदाता प्रभावित गर्ने काम गरे, बृद्धबृद्धाको मत उनीहरुले भने विपरित खसालेको र विदेशमा भएकाको नाममा समेत मत खसालेको पाइयो’–कंडलले भने–‘महिलाहरुलाई आमा समूहबाट निकाल्छौं, मलामी पनि जान्नौं भन्नेसम्म तल्लो स्तरमा गिरेर चुनाव प्रभावित गर्न खोजियो तै पनि पहिलो प्रयासमै गठबन्धनलाई राम्रै धक्का दिन सफल भयौं ।’ उपभोक्ताको सार्वजनिक संस्थामा ठूला दलले भागबण्डा र मिलेमतो गरेर भ्रष्टाचार र अपारदर्शितालाई मलजल गरिरहेको गलत अभ्यास तोड्न जरुरी भएको कंडेलले बताए ।

रास्वपाबाटै पार्षदमा विजयी ज्ञानबहादुर केसीले खानेपानी संस्थामा जम्मा भएको करोडौं रकममाथि दुई ÷तीन वटा दलको रजाई र अनियमितता रोक्न उपभोक्ताले विकल्प खोजेर आफूहरुलाई जिताएको बताए । अब आफूहरुले उपभोक्ताबाट धारा जडानमा लिइने चर्को शुल्क, संस्थाको वजेटमा गरिने मनोमानी नियन्त्रण गर्न पहल गर्ने बताए । केसीले आफूहरुले उपभोक्ताबाट उठाइएको रकम वैठक भत्ता वापत नलिने र अरु पदाधिकारी र सदस्यलाई पनि लिन नदिने व्यवस्थाका लागि काम गर्ने बताए ।

राष्ट्रिय जनमक्ति पार्टी तिलोले त्तमा अध्यक्ष भोमबहादुर बुढाले नगरभित्र क्रियाशील सबै दललाई न्यायोचित ढंगले समावेश गरेर सहमतिमा पार्षद र नेतृत्व चयन गरौं भन्दा ठूला दलले दम्भ देखाएर एकलौटी गर्न खोजेको हुंदा चुनावका नाममा उपभोक्तालाई दुख र सास्ती दिने काम भएको बताए ।

संस्थामा ८ हजार ५ सय बढी धाराका उपभोक्ता सदस्य छन् । १२४ जना कुल पार्षद मतदातामा १५ जना पुर्व कार्यसमति सदस्य,३ जना लेखा समति सदस्य र ८ जना मनोनित गर्ने विधानमा व्यवस्था रहेको अध्यक्ष केशवराज न्यौपानेले बताए । अध्यक्ष न्यौपानेले संस्थाको विधान अनुसार निष्पक्ष चुनाव भएको दावी गरे ।
क्षेत्रगत चुनाव सकिएपछि संस्थाको अध्यक्ष,उपाध्यक्ष,लेखा समिति र कार्यसमिति सदस्यहरुको चुनाव हुनेछ । संस्थामा महासचिव,सचिव कोषाध्यक्ष जस्ता पदहरु नभएको अध्यक्ष न्यौपानेले बताए । निर्वाचनका लागि माधव पाठक संयोजक भएको निर्वाचन समिति गठन भएको छ ।