खोज

काठमाडौं, २२ मंसिर ।

 लगातार छैटौं कारोबार दिन सेयर बजार घटेको छ । सोमबार बजार परिसूचक नेप्से ३.०२ अंकले घटेर २६०६ मा कायम भएको छ ।

गत साता कारोबार भएका चार दिन र यो साताका दुई दिन गरी कुल ६ दिन बजार घटेको छ । विगत ६ दिनमा नेप्से १७० अंकले घटिसकेको छ । मंसिर ११ गते नेप्से २७७६ अंकमा थियो ।

मुलुकमा व्याप्त राजनीतिक अस्थिरता र चुनावको अनिश्चितता जस्ता कारणले लगानीकर्तामा आत्मविश्वास बढ्न सकेको छैन ।

सोमबार ९९ कम्पनीको मूल्य बढ्दा १४७ कम्पनीको घट्यो भने १२ कम्पनीको मूल्य स्थिर रह्यो । दिनभर बजार सामान्य उतारचढावमा रह्यो ।

सोमबारको बजारमा जलविद्युत् ०.१२%, जीवन बीमा ०.५०%, उत्पादन तथा प्रशोधन ०.६१%, निर्जीवन बीमा ०.०५% र व्यापार ०.४१%ले बढे । बैंकिङ ०.६७%, विकास बैंक ०.११%, फाइनान्स ०.५७%, होटल तथा पर्यटन ०.२३%, लगानी ०.१६%, माइक्रोफाइनान्स ०.२९% र अन्य ०.२१%ले घटे ।

चार कम्पनीको मूल्य १०%ले बढेको छ । यसमा अपर स्याङ्गे हाइड्रोपावर, स्वस्तिक लघुवित्त, झापा इनर्जी र श्रीनगर एग्रिटेक समावेश छन् ।

त्यसैगरी, इङ्वा हाइड्रोपावरको मूल्य ९.०३% र पियोर इनर्जीको ४.४%ले बढेको छ । सपोर्ट माइक्रोफाइनान्सको मूल्य ५.१६%, मेन्छियाम हाइड्रोपावर ३.७३% र गुहेश्वरी मर्चेन्ट बैंक ३.६८%ले घटेको छ ।

आज धेरै कारोबार भएका प्रमुख कम्पनीहरूमा ङादी ग्रुप, सागर डिस्टिलरी, राधि विद्युत् र झापा इनर्जी रहेका छन् ।