खोज

काठमाडौँ, २२ मङ्सिर । 

नेकपा एमालेका नेता कर्ण थापाले अध्यक्ष केपी शर्मा ओलीको शैली र नेतृत्वप्रति तीव्र असन्तुष्टि व्यक्त गरेका छन् । सोमबार काठमाडौंमा आयोजित कार्यक्रममा उनले पार्टीभित्र बहस र संवादको संस्कृति कमजोर भएको भन्दै अब एमाले यसरी चल्न नसक्ने टिप्पणी गरे ।

‘केन्द्रीय कमिटीका बैठक भनेको उहाँ उभिने, भाषण गर्ने,’ थापाले भने, ‘भाषण जति मन लाग्छ त्यति गर्ने। जे मन लाग्छ त्यो कुरा भन्ने । उहाँले भनेको कुरा मार्क्सवाद हो उहाँले भनेको कुरा जबज हो । उहाँले भनेको कुरा निर्णय हो । यो बहुदलीय जनवादसँग कहीँ मेल खाँदैन, द्वन्द्ववादसँग मेल खाँदैन, मार्क्सवादसँग पनि मेल खाँदैन ।’

थापाले पार्टीभित्र यस्ता अभ्यासविरुद्ध धेरै नेता मौन बसेको उल्लेख गर्दै अब परिवर्तन आवश्यक भएको बताए । ‘हामी बहस गर्न चाहन्छौं । तर्क–वितर्क गर्न चाहन्छौं । देशका जटिल विषयमा खुला छलफल गर्न चाहन्छौं,’ उनले भने ।

उनले कम्युनिस्ट आन्दोलनलाई अगाडि बढाउने र सामूहिक नेतृत्व प्रणालीमा जानेतर्फ उन्मुख हुने भन्दै ओलीले विदा लिनुपर्ने बताए । ‘हामीले नेपालको कम्युनिस्ट आन्दोलनको भविष्यलाई अगाडि बढाउनुपर्छ, सामूहिक नेतृत्व प्रणालीमा जाने र मूल्यांकनको सही परिपाटी स्थापित गर्ने,’ थापाले भने, ‘यी कुरा बुझेर उहाँले विदा लिनुपर्छ । उहाँ विदा हुनुभयो भने उहाँको सम्मान बढ्नेछ ।’