खोज

सुर्खेत, ८ मंसिर ।

चार दिनअघि निमोनियाका कारण त्रिपालमुनि बस्दै आएका जाजरकोटका एक महिने शिशुको ज्यान गयो । भूकम्पले घरमा क्षति पुगेपछि त्रिपालमा बस्दै आएका भेरी नगरपालिका–२ का हुकुमबहादुर पुनका एक महिनाकी छोरी निरुताको चिसोले निधन हो ।

भेरी –२ का पूर्ववडाध्यक्ष कालीबहादुर वलीका अनुसार तीन दिनअघि बिरामी परेकी शिशुलाई उपचारका लागि जिल्ला अस्पताल लगिएको थियो । कडा निमोनियाले थला परेकी निरुताको उपचारका क्रममा मृत्यु भयो । जिल्ला स्वास्थ्य सेवा कार्यालयका सूचना अधिकारी कृष्णबहादुर खत्रीका अनुसार चिसोबाट जाजरकोटमा त्रिपालमुनि बस्दै आएका अधिकांश बालबालिका बिरामी परेका छन् ।

छेडागाड नगरपालिका वडा नम्बर १३ थानवाडाकी ५६ वर्षीया मनसरी कामीको पनि एक साता अघि मृत्यु भयो । उनलाई कात्तिक १९ गतेदेखि ज्वरो र टाउको दुख्न सुरू भएको थियो । कात्तिक २६ गते उनी सिकिस्त भइन् । उपचारका लागि सुर्खेत लैजाने तयारी गर्दागर्दै मनसरीको मृत्यु भएको उनका छोरा अमरबहादुर विकले जानकारी दिए । मनसरीलाई करिब ८ वर्षदेखि दम थियो । उनलाई कहिले गाउँमै, कहिले सुर्खेत, नेपालगञ्ज र चौरजहारीसम्म पु¥याएर परिवारले उपचार गराइराखेका थिए । ‘हामीसँग पाल थिएन, त्यसैले चर्किएकै अर्को घरमा बस्यौं’ उनले भने, ‘त्यो घर पनि एकदमै चिसो थियो, चिसो र रोगले गलाएर आमा बित्नु भयो ।’

जुनी चाँदे गाउँपालिका वडा नम्बर ४ लुहादहकी सुगिली नेपालीको पनि चिसोले गएको कात्तिक २९ गते मृत्यु भयो । केही महिनायता दमको औषधि सेवन गरिरहेकी सुगिलीलाई चिसोले झन् समस्या पारेको र मृत्यु भएको उनकी बुहारी सुर्मा नेपालीले बताइन् । पहिले पनि चिसोको कारण सासुआमा बिरामी हुँदै आएको उनले बताइन् ।

गएको कात्तिक १७ गते जाजरकोट केन्द्रविन्दु भएर भुकम्प गएयता यहाँका नागरिकहरुको चिसोको कारण ज्यान गइरहेको छ । निमोनिया तथा दम तथा विभिन्न दीर्घ रोगीहरु त्रिपालभित्र ज्यान गुमाउन बाध्य छन् । हालसम्म ११ जना चिसोको कारण ज्यान गुमाइसकेका छन् ।

भूकम्पको केन्द्रबिन्दु बारेकोट गाउँपालिकामा मात्र चिसोका कारण ४ जनाको ज्यान गइसकेको छ । यहाँका भूकम्पपीडितलाई न्यानो गरी व्यवस्थापन गर्न समस्या भइरहेको गाउँपालिकाका अध्यक्ष विरबहादुर गिरी बताए । यस पालिकामा मात्र चार हजार चार सय ६७ घरधुरीका अधिकांश मानिस घरबाहिरै रहेका छन् ।

दीर्घरोगी, बालबालिका र चिसोले छिटो गाँज्ने अशक्त, सुत्केरीका लागि त्रिपालमुनिको बसाई यातना नै भएको गिरीले बताए । रातभरि शित चुहिने र त्यसभित्र एउटा कम्बलका भरमा परिवारै बस्नुपर्ने अवस्थाले समस्या भएको उनले बताए ।